ప్రభుత్వ నిర్లక్ష్యంతో క్రాప్ హాలీడే, హామీతోనే విరమణ అంటున్న రైతులు

By Srinivas

Published: Friday, June 24, 2011, 11:46 [IST]

హైదరాబాద్: ప్రభుత్వం నిర్లక్ష్యం వల్ల రైతులు క్రాప్ హాలీడే ప్రకటిస్తున్నారు. ఇందుకు వారు ప్రభుత్వాన్ని బాధ్యులను చేస్తూ విమర్శలు చేస్తున్నారు. దిక్కుతోచని పరిస్థితుల్లోనే తాము క్రాప్ హాలీడే ప్రకటించాల్సి వస్తుందని, అధికారులు, ప్రజాప్రతినిధుల నిర్లక్ష్య వైఖరి కారణంగా సాగు చేయలేక పోతున్నామని, అందుకే క్రాప్ హాలీడేకు నిర్ణయం తీసుకున్నామని రైతులు వాపోతున్నారు. కాగా రాష్ట్రవ్యాప్తంగా రైతులు పలుచోట్ల క్రాప్ హాలీడే ప్రకటిస్తున్నారు. రెండు నెలలుగా తాము క్రాప్ హాలీడే ప్రకటిస్తున్నప్పటికీ ప్రభుత్వం, అధికారులు నిర్లక్ష్యం చేస్తున్నారని రైతులు ఆరోపిస్తున్నారు. సాక్ష్యాత్తు మంత్రి విశ్వరూప్‌కు గురువారం రైతు సంఘాలు క్రాప్ హాలీడేపై తమ ఆవేదనను తెలియజేశాయి.

క్రాప్ హాలిడేకు అంత సీన్ లేదన్న వ్యాఖ్యలపై రైతు సంఘాలు మండిపడటంతో తాను అలా అనలేదని క్రాప్‌హాలిడే ప్రకటించాల్సిన పరిస్థితుల్లేవని మాత్రమే అన్నానని అయినప్పటికీ తన వ్యాఖ్యలవల్ల రైతుల మనోభావాలు దెబ్బతింటే బహిరంగ క్షమాపణ చెబుతున్నట్టు ప్రకటించారు. ప్రభుత్వం గోనె సంచులు సరఫరా చేయడం లేదని రైతులు ఆరోపిస్తున్నారు. రైతులకు పావలా వడ్డీ రుణాలు ఇవ్వడం లేదనే ఆరోపణలు కూడా వినిపిస్తున్నాయి. అంతేకాకుండా వ్యవసాయ పనుల సమయంలోనే ఉపాధి హామీ పనులు నిర్వహించడం నష్టం కలిగిస్తుందని పలువురు అభిప్రాయపడుతున్నారు. రైతులకు కనీస మద్దతు ధర లేదని పలు రైతు సంఘాలు, పార్టీలు ఆరోపిస్తున్నాయి కూడా. ఇక రైతులు తమకు ప్రభుత్వం స్పష్టమైన హామీ ఇచ్చే వరకు క్రాప్ హాలీడే విరమించే ప్రసక్తి లేదని తేల్చి చెబుతున్నారు.

Published On June 24, 2011