విజయవాడలోనే లగడపాటి దుమ్ము దులుపుతా!: ధ్వజమెత్తిన పొన్నం

న్యూఢిల్లీ: విజయవాడ పార్లమెంటు సభ్యుడు లగడపాటి రాజగోపాల్‌ సొంత నియోజకవర్గం విజయవాడలో రోజోకో ప్రెస్ కాన్ఫరెన్సు పెట్టి ఆయన గురించి నిజాలు చెబుతానని టి-కాంగ్రెసు ఎంపి పొన్నం ప్రభాకర్ శుక్రవారం తీవ్రస్థాయిలో ధ్వజమెత్తారు. న్యూఢిల్లీలోని విలేకరుల సమావేశంలో పొన్నం మాట్లాడారు. లగడపాటి రాజగోపాల్ ధన, కుల అహంకారంతోనే తనపై అనుచిత వ్యాఖ్యలు చేస్తున్నాడని ఆరోపించారు. తాను ఎవరి నుండి అయినా డబ్బులు తీసుకున్నట్లు నిరూపిస్తే తాను ఏ శిక్షకైనా సిద్ధమని చెప్పారు. లగడపాటి రాజగోపాల్‌కు నాయకత్వంపై నమ్మకం లేదన్నారు. అందుకే తమపై అనుచిత వ్యాఖ్యలు చేస్తున్నాడని ఆరోపించారు.

విజయవాడలోనే తాను రోజుకో ప్రెస్ కాన్ఫరెన్సు పెట్టి ఆయన బండారం బయట పెడతానని అన్నారు. తెలంగాణ సమస్యను త్వరగా పరిష్కరించాలని సిడబ్లుసిని కోరతామని ఆయన అన్నారు. తాను ఎంపీ పదవికి రాజీనామా చేసేందుకు సిద్ధంగా ఉన్నానని అన్నారు. తెలంగాణలో చాలామంది ప్రత్యేక తెలంగాణ కోరుకోవడం లేదని అంటున్న లగడపాటి కూడా దమ్ముంటే రాజీనామా చేసి కరీంనగర్ నుండి పోటీ చేయాలని సవాల్ విసిరారు.

English summary

MP Ponnam Prabhakar fired at Vijayawada MP Lagadapati Rajagopal today. He challenged that he is ready to resign. He demanded Lagadapati to resign and to contest from Telangana.