తెలంగాణ ఉమ్మడి వేదికకు కోదండరామ్ యత్నాలు

By Srinivas

Published: Friday, July 8, 2011, 14:46 [IST]

హైదరాబాద్: ప్రత్యేక తెలంగాణ రాష్ట్ర సాధన కోసం తెలంగాణ ఐక్య కార్యాచరణ సమితి చైర్మన్ కోదండరాం అన్ని పార్టీలతో కలిసి ఉమ్మడి వేదికకు ప్రయత్నాలు చేస్తున్నారు. రాజీనామాలు చేసిన తెలంగాణ ప్రాంత శాసనసభ్యులతో ఉమ్మడి కార్యాచరణ ఏర్పాటు చేయడం కోసం కోదండరాం కాంగ్రెసు, తెలుగుదేశం పార్టీ, ఇతర నేతలను కలుస్తున్నారు. శుక్రవారం మధ్యాహ్నం కోదండరాం కాంగ్రెసు పార్టీ రాజ్యసభ సభ్యుడు కె కేశవరావుతో సమావేశమయ్యారు. అనంతరం ఆయన విలేకరులతో మాట్లాడారు. ఉమ్మడి కార్యాచరణ కోసం ఏర్పాటు చేసే సమావేశంలో పాల్గొనేందుకు రమ్మని కెకెను ఆహ్వానించానని ఆయన వస్తానని చెప్పారని అయితే కాస్త సమయం అడిగారని చెప్పారు.

కోదండరాం టిడిపి నుండి బహిష్కరించబడిన నాగం జనార్దన్ రెడ్డిని కలుస్తారు. తెలుగుదేశం పార్టీని సైతం కలుస్తానని చెప్పారు. రాజీనామా చేసిన వారందరినీ కలుపుకొని పోతామని ఆయన చెప్పారు. న్యూఢిల్లీలో తెలంగాణ ఆకాంక్షను గట్టిగా వినిపించాలని ఆయన కోరారు. ఉమ్మడి కార్యాచరణపై సమాలోచనలు జరుపుతున్నామని వరంగల్ పార్లమెంటు సభ్యుడు రాజయ్య వేరుగా చెప్పారు. ప్రజల మనోభావాలకు అధిష్టానం విలువ ఇవ్వాలన్నారు. కేంద్రం వెంటనే తెలంగాణను ప్రకటించాలి. లేదా రాజీనామాలు ఆమోదించాలని డిమాండ్ చేశారు. తమతో కలిసి వచ్చే వారిని కలుపుకొని పోతామని చెప్పారు.

Published On July 8, 2011