వైయస్ మృతి తర్వాత పట్టు తప్పాయి: చిదంబరం

By Pratap

Published: Tuesday, July 19, 2011, 16:42 [IST]

న్యూఢిల్లీ: వైయస్ రాజశేఖర రెడ్డి మృతి తర్వాత ప్రాంతీయ వాదాలు పట్టు తప్పాయని కేంద్ర హోం మంత్రి పి. చిదంబరం సీమాంధ్ర నాయకులతో అన్నట్లు సమాచారం. రాష్ట్రంలో ఇబ్బందులు ఎదుర్కోవాల్సిన పరిస్థితి వచ్చిందని ఆయన ఆవేదన వ్యక్తం చేశారు. రాష్ట్రాన్ని సమైక్యంగా ఉంచాలని కోరడానికి కాంగ్రెసు సీమాంధ్ర నేతలు మంగళవారం సాయంత్రం చిదంబరాన్ని కలిశారు. ఆంధ్ర, తెలంగాణ సమస్యలు తనకు తెలుసునని ఆయన అన్నారు. శాంతిని పాటించాలని, సమస్య పరిష్కారమవుతుందని ఆయన సీమాంధ్ర నాయకులకు సూచించారు. తెలంగాణపై ఏకాభిప్రాయ సాధన కోసం ప్రయత్నిస్తున్నట్లు ఆయన తెలిపారు.

శాంతియుతంగా ఉద్యమాలు చేయాలని, ఇతరులకు హాని కలగకుండా చూడాలని కూడా కేంద్ర మంత్రి వారికి సూచించారు. ఇటువంటి సమావేశాలు ఇంకా జరుగుతాయని ఆయన అన్నారు. తెలంగాణపై నిష్పక్షపాతంగా నిర్ణయం తీసుకుంటామని చిదంబరం తమతో చెప్పినట్లు సీమాంధ్రకు చెందిన రాష్ట్ర మంత్రి శైలజానాథ్ భేటీ తర్వాత మీడియా ప్రతినిధులతో చెప్పారు. శాంతిని పాటించాలని సూచించినట్లు ఆయన తెలిపారు. శ్రీకృష్ణ కమిటీ నివేదికలోని ఆరో ప్రతిపాదనను అమలు చేయాలని తాము చిదంబరాన్ని కోరినట్లు ఆయన తెలిపారు. రాష్ట్రం విడిపోదని పార్లమెంటు సభ్యుడు కావూరి సాంబశివరావు ధీమా వ్యక్తం చేశారు. తెలంగాణవాదులు తమను రెచ్చగొట్టినా తాము సహనం పాటిస్తామని ఆయన అన్నారు.

Published On July 19, 2011