ఉగ్రవాదంపై పోరులో భారత్‌కు హిల్లరీ క్లింటన్ బాసట

By Pratap

Published: Tuesday, July 19, 2011, 16:12 [IST]

న్యూఢిల్లీ: ఉగ్రవాదంపై భారతదేశం చేస్తున్న పోరాటానికి తమ సహాయసహకారాలు ఉంటాయని అమెరికా విదేశాంగ మంత్రి హిల్లరీ క్లింటన్ చెప్పారు. భారత విదేశాంగ మంత్రి ఎస్ఎం కృష్ణ, హిల్లరీ క్లింటన్ వ్యూహాత్మక భాగస్వామ్యంపై ఢిల్లీలోని హైదరాబాద్ హౌస్‌లో చర్చలు జరిగాయి. అనంతరం వారిద్దరు సంయుక్త మీడియా ప్రతినిధుల సమావేశంలో పాల్గొన్నారు. ప్రపంచ వ్యూహాత్మక భాగస్వామాన్ని పెంపొందించుకోవడానికి ఇరుదేశాలు కట్టుబడి ఉన్నాయని కృష్ణ చెప్పారు. 21వ శతాబ్దంలో ఇది అత్యంత ప్రధానమైందని ఆయన అన్నారు.

వివిధ రంగాలకు సంబంధించి ఇరువురి మధ్య ఒప్పందాలు కుదిరాయి. ఇరు నేతల మధ్య ఉగ్రవాదంపై కూడా చర్చ జరిగింది. ఉగ్రవాదులకు ఏ దేశం కూడా ఆశ్రయం కల్పించకూడదని హిల్లరీ క్లింటన్ అన్నారు. భారత్, పాకిస్తాన్ మధ్య చర్చలు జరగడం తమకు ఉత్సాహాన్నిస్తోందని ఆమె అన్నారు. ఉగ్రవాదంపై పోరులో పాకిస్తాన్ తమ కీలక మిత్రదేశమని, ఉగ్రవాదంపై కఠినంగా వ్యవహరించాలని తాము పాకిస్తాన్‌కు చెబుతున్నామని ఆమె అన్నారు.

Published On July 19, 2011