సిబిఐ విచారణపై సుప్రీంకోర్టుకు వైయస్ జగన్

By Pratap

Published: Tuesday, July 19, 2011, 10:52 [IST]

న్యూఢిల్లీ: తన ఆస్తులపై సిబిఐ విచారణ ఆపించాలని కోరుతూ వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి సుప్రీంకోర్టుకు వెళ్లారు. సుప్రీంకోర్టులో ఆయన స్పెషల్ లీవ్ పిటిషన్ దాఖలు చేశారు. ఈ పిటిషన్ బుధవారం సుప్రీంకోర్టులో విచారణకు వచ్చే అవకాశం ఉంది. వైయస్ జగన్ ఆస్తులపై ప్రాథమిక విచారణ జరిపి రెండు వారాల్లోగా తమకు సీల్డ్ కవర్‌లో నివేదిక సమర్పించాలని రాష్ట్ర హైకోర్టు ఇటీవల సిబిఐని ఆదేశించిన విషయం తెలిసిందే. ఈ ఆదేశాల మేరకు సిబిఐ విచారణ కూడా చేపట్టింది. జగన్ సంస్థలకు, ఆయన సంస్థల్లో పెట్టుబడులు పెట్టిన సంస్థలకు సిబిఐ నోటీసులు జారీ చేసి, ఆ సంస్థల ప్రతినిధులను విచారిస్తోంది.

ప్రస్తుత మంత్రి పి. శంకరరావు రాసిన ఓ లేఖను తనంత తానుగా విచారణకు స్వీకరించి హైకోర్టు సిబిఐకి ఆ ఆదేశాలు జారీ చేసింది. ఈ కేసులో తెలుగుదేశం నాయకులు ఎర్రంనాయుడు, యనమల రామకృష్ణుడు, బైరెడ్డి రాజశేఖర రెడ్డి, కడప జిల్లా న్యాయవాది షేర్వాణి ఇంప్లీడ్ అయ్యారు. సుప్రీంకోర్టులో తెలుగుదేశం నాయకులు కెవియట్ పిటిషన్ కూడా దాఖలు చేశారు. వైయస్ జగన్ సుప్రీంకోర్టుకు వెళ్తే సమాచారం తెలుగుదేశం నాయకులకు కూడా అంది విచారణలో తమ వాదనలను వినిపించడానికి తెలుగుదేశం నాయకులకు అవకాశం కల్పిస్తారు.

Published On July 19, 2011