మేమో అడుగేశాం, ఐనా రెచ్చగొడుతున్నారు: విహెచ్

By Srinivas

Published: Thursday, July 28, 2011, 15:53 [IST]

న్యూఢిల్లీ: ప్రత్యేక తెలంగాణ రాష్ట్రం విషయంలో పదేళ్ల ఉమ్మడి రాజధాని అంటూ తాను ఓ ప్రతిపాదన తీసుకు వచ్చి సామరస్యంగా సమస్యను పరిష్కరించడానికి ఓ అడుగు ముందుకు వేసినప్పటికీ సీమాంధ్ర ప్రజా ప్రతినిధులు రెచ్చగొట్టే వ్యాఖ్యలు చేస్తున్నారని కాంగ్రెసు పార్టీ రాజ్యసభ సభ్యుడు వి హనుమంత రావు గురువారం న్యూఢిల్లీలో విలేకరుల సమావేశంలో అన్నారు. రాష్ట్రం విడిపోయినప్పటికీ తెలుగు వారమందరం కలిసి ఉందామనే తెలంగాణ ప్రజలు కోరుకుంటున్నారని అన్నారు. విడిపోయి అన్నదమ్ముల్లా ఉందామని సూచించినప్పటికీ రెచ్చగొట్టే వ్యాఖ్యలు చేయడం సరికాదన్నారు. రెచ్చగొట్టే వ్యాఖ్యలు చేస్తే తర్వాత జరిగే పరిణామాలకు మేం బాధ్యులం కాదని చెప్పారు. సీమాంధ్ర ప్రజా ప్రతినిధులకు చెందిన ఆస్తులు మాకు అవసరం లేదన్నారు.

రాష్ట్రం విడిపోయినా ఎవరి వ్యాపారులు వారు చేసుకోవచ్చునని అన్నారు. స్వయం పాలన, ఉద్యోగాల కోసమే తెలంగాణ ప్రజలు ప్రత్యేక రాష్ట్రాన్ని కోరుకుంటున్నారని అన్నారు. ఎంపీ కావూరి సాంబశివ రావు వంటి సీనియర్ నేతలు అపహాస్యం చేస్తూ మాట్లాడటం సరికాదన్నారు. ఈ మధ్య రాజకీయాల్లోకి వచ్చిన వారు పోకస్ కోసం ఎగిరి పడటంలో తప్పు లేదు. కానీ గత పదేళ్లుగా ప్రత్యేకంపై నోరు మెదపని సీనియర్లు ఇప్పుడే మాట్లాడటం వెనుక అర్థం ఏమిటని ప్రశ్నించారు. కేంద్రమంత్రి, రాష్ట్ర వ్యవహారాల ఇంచార్జి గులాం నబీ ఆజాదుతో ఇరు ప్రాంతాల నేతలు సమస్యల పరిష్కారం కోసం మాట్లాడుతున్న సమయంలో రెచ్చగొట్టే వ్యాఖ్యలు మానుకోవాలని సూచించారు. అధిష్టానం తెలంగాణ సమస్యను వెంటనే పరిష్కరించాలని సూచించారు.

భారతీయ జనతా పార్టీ మాజీ అధ్యక్షుడు ఎల్‌కె అద్వానీ, ఆ పార్టీ సీనియర్ నేత వెంకయ్య నాయుడు, సిపిఐ రాష్ట్ర కార్యదర్శి నారాయణను సీమాంద్ర నేతలు ఇప్పుడు విమర్శించడం ఎంత వరకు సమంజసం అన్నారు. వారు ఏళ్లుగా తెలంగాణకు అనుకూలమని చెబుతున్నారని అప్పుడెందుకు వారిని ప్రశ్నించ లేదన్నారు. వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి స్టాండును ప్రశ్నించే తెలుగుదేశం పార్టీ నేతలు ముందు ఆ పార్టీ అధ్యక్షుడు నారా చంద్రబాబు నాయుడి వైఖరి తేల్చాలని డిమాండ్ చేశారు.

Published On July 28, 2011