కెసిఆర్ రెచ్చగొడుతున్నారు: లగడపాటి రాజగోపాల్

By Srinivas

Published: Tuesday, August 2, 2011, 18:05 [IST]

న్యూఢిల్లీ: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు తన వ్యాఖ్యల ద్వారా తెలంగాణ యువతను, విద్యార్థులను ఆత్మహత్యలకు పురిగొల్పుతున్నారని విజయవాడ పార్లమెంటు సభ్యుడు లగడపాటి రాజగోపాల్ మంగళవారం న్యూఢిల్లీలో విలేకరుల సమావేశంలో అన్నారు. రాష్ట్రం విడిపోతే తెలంగాణ ప్రజల జీవితాలు మారిపోతాయని అక్కడి ప్రజల్లో భ్రమలు కలిగిస్తున్నారని అన్నారు. రెండు రోజుల క్రితం కెసిఅర్ విషం తాగి చస్తానని అనడం యువతను, విద్యార్థులను ఉద్వేగానికి, ఉద్రేకానికి గురి చేస్తుందని అన్నారు. నాయకులు పోరాటం చేయాలే కానీ చస్తానని అనడం సరికాదన్నారు. హరీష్ రావు రెచ్చగొట్టే వ్యాఖ్యల ద్వారనే శ్రీకాంతచారి మృతి చెందినట్లుగా కనిపిస్తోందని అన్నారు. తాను తెలంగాణ వద్దని ఎప్పుడూ అనలేదని, శాస్త్రీయ పద్ధతి అని మాత్రమే చెప్పానని అన్నారు.

సీమాంధ్ర ప్రాంతం నుండి వెళ్లిన కెసిఆర్, విజయశాంతి తెలంగాణ ఉద్యమానికి నాయకత్వం వహించడం విశేషం అన్నారు. రెచ్చగొడితే నాయకులకు పదవులు వస్తాయి. కానీ అమాయ ప్రజలు మృతి చెందుతారని ఆయన ఆవేదన వ్యక్తం చేశారు. యుపత అపోహలకు పోయి ఆత్మహత్యలకు పాల్పడవద్దని కోరారు. తెలుగు వారిని విడదీసి కొందరు పబ్బం గడుపుకోవాలని చూస్తున్నారని అన్నారు. తెలంగాణ కోసం యువత, విద్యార్థులు ఆత్మహత్యలు చేసుకున్నారు. కానీ ఎక్కడా నేతల పిల్లలు ఆత్మహత్యలు చేసుకోలేదన్నారు. తన దృష్టిలో తెలంగాణకు పరిష్కారం వచ్చిందన్నారు. తెలంగాణలో నాకు కోపం ఉండవచ్చు. కానీ తెలంగాణపై తాను ఎవ్వరినీ ఆశపెట్టలేదన్నారు. వలసవాదులంటే ప్రతి ఒక్కరూ వలసవాదులే అన్నారు. కేంద్రం తెలంగాణ ఇవ్వడానికి చట్టం తెస్తే అప్పుడు ఆలోచిస్తానని అన్నారు.

Published On August 2, 2011