చిదంబరానికి తెలంగాణ శాపం పెట్టిన కెసిఆర్

హైదరాబాద్: తెలంగాణపై ఏకాభిప్రాయం కావాలని చెప్పిన కేంద్ర హోం మంత్రి పి. చిదంబరంపై తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు తీవ్రంగా మండిపడ్డారు. తెలంగాణ అంశం పామై మెడుకు చుట్టుకుని కాటేస్తుందని ఆయన అన్నారు. తెలంగాణ సిద్ధాంతకర్త జయశంకర్ విగ్రహాన్ని తెలంగాణ భవన్‌లో ఆయన శనివారం ఆవిష్కరించి మాట్లాడారు. తెలంగాణపై కుంటిసాకులు చెబుతున్న కేంద్ర ప్రభుత్వం ఇప్పుడు కాకపోతే 2014లోనైనా దొరకదా అని ఆయన అన్నారు. తెలంగాణపై పాత చింతకాయ పచ్చడి ప్రకటన చేశారని ఆయన వ్యాఖ్యానించారు.

ప్రొఫెషనల్ అయిన చిదంబరం ఇంత దిక్కుమాలిన ప్రకటన చేస్తాడని అనుకోలేదని, ఆ ప్రకటన చేయడానికి కొంతైనా అభిమానం ఉండాలని ఆయన అన్నారు. తెలంగాణ ప్రజలు సహనం కోల్పోవద్దని ఆయన సూచించారు. తెలంగాణ రాష్ట్ర సాధనే తమ లక్ష్యమని ఆయన అన్నారు. ప్రజాప్రతినిధులు రాజీనామాలు చేసినా దిగి రాకుండా తెలంగాణపై కాంగ్రెసు అధిష్టానం కుంటిసాకులు చెబుతోందని ఆయన అన్నారు. జయశంకర్ స్ఫూర్తిగా తెలంగాణ సాధన కోసం ఉద్యమిద్దామని ఆయన అన్నారు.

సమైక్యవాదుల కుట్రలను తిప్పికొట్టే సత్తా తెలంగాణవాదులకు ఉందని పార్లమెంటు సభ్యురాలు విజయశాంతి అన్నారు.

English summary

TRS president K Chandrasekhar Rao expressed anguish at Union minister Chidambaram.