సీమాంధ్రుల నేతల వ్యాఖ్యలు బెదిరింపులు: పొన్నం

By Srinivas

Published: Thursday, August 11, 2011, 17:00 [IST]

హైదరాబాద్: తెలంగాణ అంశంపై సీమాంధ్ర ప్రజా ప్రతినిధుల డిమండ్ల తీరు అధిష్టానాన్ని బెదిరించే రకంగా ఉందే కానీ తమ ఆకాంక్షను చెప్పే విధంగా లేదని కాంగ్రెసు పార్టీ పార్లమెంటు సభ్యుడు పొన్నం ప్రభాకర్ గురువారం విమర్శించారు. మీకు కావాల్సింది మీరు చెప్పుకోండి. కానీ తెలంగాణకు అడ్డుపడేందుకు కుట్ర, బెదిరింపులకు పాల్పడకండని ఆయన సీమాంధ్ర నేతలకు సూచించారు. తెలంగాణ వస్తే నక్సలైట్లు, మతకల్లోహాలు తదితర అరాచకాలకు ఆస్కారం ఉందని చెప్పడాన్ని మానుకోవాలన్నారు. తెలంగాణలో గతంలో మతకల్లోహాలు లేవని అన్నారు.

ఒకవేళ రాష్ట్రం ఏర్పాడ్డాక ఏమైనా సమస్యలు ఎదురైతే మా పాట్లు ఏవో మేం పడతామన్నారు. తెలంగాణ రాష్ట్రం ఇచ్చాకు కృష్ణా జిల్లాను ప్రత్యేక రాష్ట్రంగా ప్రకటించినా తమకు ఎలాంటి అభ్యంతరం లేదన్నారు. 14ఎఫ్‌పై కేంద్ర మంత్రులు చిదంబరం, గులాం నబీ ఆజాద్‌లు లేఖ రాసినట్లు చెప్పారు. వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి దేవుడిపై భారం వేయడం మానుకొని తన నిజాయితీ నిరూపించుకోవాలన్నారు. అంతేకానీ కాంగ్రెసును విమర్శించడం సరికాదన్నారు.

Published On August 11, 2011