కాంగ్రెసులో మూడో పవర్ సెంటర్‌గా చిరంజీవి

By Pratap

Published: Friday, September 2, 2011, 13:50 [IST]

హైదరాబాద్: ప్రజారాజ్యం పార్టీ విలీన ప్రక్రియ పూర్తి కావడంతో కాంగ్రెసులో అధికార కేంద్రాలు పెరుగుతున్నాయి. పార్టీలో చిరంజీవి మూడో పవర్ సెంటర్‌గా మారబోతున్నారు. చిరంజీవి ఓ పవర్ సెంటర్‌గా మారుతారనే విషయాన్ని ప్రదేశ్ కాంగ్రెసు కమిటీ (పిసిసి) అధ్యక్షుడు బొత్స సత్యనారాయణ కూడా అంగీకరిస్తున్నారు. దాదాపు ఎనిమిది నెలల తర్వాత ప్రజారాజ్యం పార్టీ కార్యాలయానికి చిరంజీవి గురువారం వచ్చారు. వినాయక చవితి పూజలు చేశారు. ఇక నుంచి ఇది తన వ్యక్తిగత కార్యాలయం అవుతుందని చిరంజీవి చెప్పారు. తీరిక లేకపోవడం వల్లనే తాను ఇంత కాలం కార్యాలయానికి రాలేదని కూడా చెప్పారు. ఇక నుంచి కాంగ్రెసు సీనియర్ నాయకుడిగా ఆ కార్యాలయాన్ని తన గ్రూపు కోసం ఆయన వాడనున్నారనేది అర్థమవుతోంది.

రాష్ట్ర స్థాయిలో ఏర్పాటయ్యే కాంగ్రెసు కోర్ కమిటీలో చిరంజీవికి స్థానం కల్పించబోతున్నారు. అయితే, పార్టీ నాయకుడిగా చిరంజీవికి పార్టీ కార్యాలయం గాంధీభవన్‌లో ఆయనకు ప్రత్యేకంగా ఓ గది కేటాయించే అవకాశం లేదు. తనను కలుసుకోవడానికి వచ్చే కాంగ్రెసు కార్యకర్తలకు, తన వర్గానికి అందుబాటులో ఉంటూ తన ప్రాబల్యాన్ని పెంచుకోవడానికి ఓ కార్యాలయం అవసరమని, వారికి నిర్ణీత సమయాల్లో అందుబాటులో ఉండాలని, అప్పుడే కాంగ్రెసు రాజకీయాల్లో రాణిస్తామని చిరంజీవి భావించి గత ప్రజారాజ్యం పార్టీ కార్యాలయాన్ని తన వ్యక్తిగత కార్యాలయంగా తీర్చిదిద్దుకుంటున్నారు.

కాంగ్రెసులో ముఖ్యమంత్రి కిరణ్ కుమార్ రెడ్డి, పిసిసి అధ్యక్షుడు బొత్స సత్యనారాయణ రెండు అధికార కేంద్రాలుగా ఉన్నారు. తమ తమ వర్గాలకు అందుబాటులో ఉంటూ పరస్పరం పైచేయి సాధించడానికి ప్రయత్నాలు సాగిస్తున్నారు. ఇక వారికి చిరంజీవి కూడా పోటీకి రానున్నారు.

Published On September 2, 2011