తిరుపతిలో చిరంజీవికి మళ్లీ చేదు అనుభవం

By Srinivas

Published: Friday, September 2, 2011, 17:44 [IST]

తిరుపతి: కాంగ్రెసు పార్టీ శాసనసభ్యుడు చిరంజీవికి తిరుపతిలో మరోసారి చేదు అనుభవం ఎదురయింది. శుక్రవారం నియోజకవర్గ పర్యటనకు వెళ్లిన చిరంజీవికి ఆహ్వానం పలకడానికి కాంగ్రెసు కార్యకర్తలు చాలామంది రాలేదు. కేవలం జిల్లా కాంగ్రెసు కమిటీ అధ్యక్షుడు మాత్రమే చిరుకు ఆహ్వానం పలకడానికి వచ్చారు. డిసిసి అధ్యక్షుడు మినహా మరే ముఖ్య కాంగ్రెసు నేత రాలేదని తెలుస్తోంది. జిల్లా నాయకులు అధిష్టానం ఆదేశాలు బేఖాతరు చేస్తూ చిరుకు స్వాగతం పలకడానికి రాలేదు. విమానాశ్రయంలో కార్యకర్తల కంటే పోలీసులే అధికంగా ఉండటం విశేషం.

కాగా ఇటీవల రంగం సినిమా శతదినోత్సవ వేడుకలకు తిరుపతికి వెళ్లిన చిరంజీవిని కేవలం ప్రజారాజ్యం పార్టీ వారే కలవడం కాంగ్రెసు నేతలు దూరంగా ఉన్నట్టు కనిపించింది. ఈ విషయంపై మీడియా వేసిన ప్రశ్నకు తాను ప్రయివేటు కార్యక్రమం కోసం మాత్రమే వచ్చానని ఈ నెల రెండో తేదిన తిరుపతి నియోజకవర్గంలో అధికారికంగా పర్యటిస్తానని అప్పుడు అందరినీ కలుస్తానని ప్రకటించారు. కానీ ఆయనకు స్వాగతం పలకడానికి మాత్రం కాంగ్రెసు వారు రాక పోవడం విశేషం.

Published On September 2, 2011