రెండో రోజూ జగతి వైస్ చైర్మన్ విజయసాయిరెడ్డి విచారణ

By Srinivas

Published: Sunday, September 4, 2011, 11:34 [IST]

హైదరాబాద్: వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డికి చెందిన జగతి పబ్లికేషన్స్ వైస్ చైర్మన్ విజయ సాయిరెడ్డి ఆదివారం కూడా సిబిఐ అధికారుల ముందు హాజరయ్యారు. శనివారం రోజు విజయ సాయి రెడ్డి సిబిఐ ముందు హాజరైన విషయం తెలిసిందే. శనివారం మధ్యాహ్నం 1 గంటలకు సిబిఐ కార్యాలయానికి వెళ్లిన విజయసాయిరెడ్డి రాత్రి 9.30గం.ల తర్వాత బయటకు వచ్చారు. సుమారు ఎనిమిది గంటలకు పైగా ఆయనను విచారణ చేశారు. అంతసేపు విచారణ చేస్తుండటంతో ఓ సమయంలో ఆయన అరెస్టయ్యారేమోననే వార్తలు కూడా గుప్పుమన్నాయి. కానీ కేవలం విచారణ మాత్రమే జరిపారు.

ఆదివారం ఉదయం కూడా విజయ సాయి రెడ్డి సిబిఐ ఎదుట హాజరయ్యారు. జగతిలోకి పెట్టుబడులు ఎలా వచ్చాయి తదితర అంశాలపై అధికారులు ఆయన నుండి కూపీలాగుతున్నట్టుగా తెలుస్తోంది. కాగా సిబిఐకి, ప్రభుత్వ శాఖల మధ్య కోఆర్డినేటర్‌గా ఆజయ్ మిశ్రా అనే అధికారిని నియమించారు. సిబిఐ 12 శాఖల నుండి జగన్, ఎమ్మార్ కేసుల విషయంలోని వివరాలను కోరింది. అజయ్ ఆయా శాఖల కార్యదర్శుల నుండి సిబిఐకి సమాచారం ఇప్పించనున్నారు.

Published On September 4, 2011