పార్టీలో నేనే సుప్రీం, టిఆర్ఎస్ విలీనం ఓకే: బొత్స

By Srinivas

Published: Thursday, September 15, 2011, 11:47 [IST]

న్యూఢిల్లీ: రాష్ట్ర కాంగ్రెసు పార్టీలో తానే సుప్రీం అని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ గురువారం న్యూఢిల్లీలో ఎబిఎన్ ఆంధ్రజ్యోతి ఛానల్‌తో మాట్లాడుతూ చెప్పారు. పార్టీలో తానే సుప్రీం అని ప్రభుత్వంలో మాత్రం ముఖ్యమంత్రి కిరణ్ కుమార్ రెడ్డి సుప్రీం అని చెప్పారు. దివంగత ముఖ్యమంత్రి వైయస్ రాజశేఖర రెడ్డి హయాంలో అవినీతి జరిగి ఉంటే సిబిఐ దర్యాఫ్తులో అన్ని విషయాలు బయటకు వస్తాయన్నారు. తెలంగాణ కోసం తెలంగాణ రాష్ట్ర సమితి కాంగ్రెసు పార్టీలో విలీనమైతే స్వాగతిస్తానని చెప్పారు. తెలంగాణ అంశం సమస్యను పరిష్కరించడానికి కేంద్రం చిత్తశుద్ధితో పని చేస్తోందన్నారు. త్వరలో అధిష్టానం నిర్ణయం తీసుకుంటుందన్నారు. తెలంగాణపై అధిష్టానం ఏం నిర్ణయం తీసుకున్న దానికి కట్టుబడి ఉంటానని స్పష్టం చేశారు.

కాగా బొత్స సత్యనారాయణ బుధవారం సైతం తెలంగాణకు త్వరలో పరిష్కారం లభిస్తోందని మీడియా సమావేశంలో చెప్పారు. మరికొద్ది రోజుల్లో తెలంగాణకు తెరపడనున్న నేపథ్యంలోనే బాన్సువాడ ఉప ఎన్నికల్లో కాంగ్రెసు తరఫున పోటీ చేయించాలనే నిర్ణయానికి అధిష్టానం వచ్చినట్లుగా ఆయన అభిప్రాయపడ్డారు. అలాగే ప్రజారాజ్యం పార్టీ కాంగ్రెసులో విలీనం అయింది కాబట్టి విశాఖపట్నంలో 25న భారీ బహిరంగ సభ ఏర్పాటు చేస్తున్నట్టు చెప్పారు.

Published On September 15, 2011