హీటెక్కిన తెలంగాణ సమ్మె: అలా వద్దన్న స్వామి

హైదరాబాద్: ఉద్యోగులు సంతకాలు చేసి సమ్మెలో పాల్గొనవద్దని తెలంగాణ ఉద్యోగ సంఘాల నేత స్వామి గౌడ్ గురువారం సూచించారు. తెలంగాణలో స్థిరపడ్డ ఇతర ప్రాంతాల నేతలు కూడా విధులకు హాజరు కావొద్దన్నారు. సకల జనుల సమ్మె ముగింపు తమ చేతుల్లో లేదని ప్రభుత్వం చేతుల్లోనే ఉందన్నారు. ప్రభుత్వంతో చర్చల ఆలోచన లేదన్నారు. సంతకాలు చేసి సమ్మెలో పాల్గొనవద్దని హెచ్చరించారు. శుక్రవారం నుండి పాఠశాలలకు తాళాలు వేసి సమ్మెలో పాల్గొంటామని తెలంగాణ ఉపాధ్యాయ సంఘం నేతలు ప్రకటించారు. విద్యార్థులకు నష్టం జరిగితే సెలవు రోజుల్లో దానిని పూర్తి చేస్తామని చెప్పారు. సకల జనుల సమ్మెకు మద్దతుగా 20వ తారీఖు నుండి సమ్మెలో పాల్గొంటామని జిహెచ్ఎంసీ తెలంగాణ ఉద్యోగులు స్పష్టం చేశారు.

సమ్మె కారణంగా వరుసగా మూడో రోజూ సింగరేణిలో బొగ్గు ఉత్పత్తి నిలిచి పోవడంతో అధికారులు ప్రత్యామ్నాయంపై దృష్టి సారించారు. అసెంబ్లీ ప్రధాన ద్వారానికి తాళం వేసిన తెలుగుదేశం పార్టీ నేతలను పోలీసులు అరెస్టు చేశారు. మరికొందరు టిటిడిపి నేతలు రహదారి పైనే భోజనాలు చేశారు. తెలంగాణ న్యాయవాదులు కాంగ్రెసు పార్టీ రాష్ట్ర కార్యాలయమైన గాంధీ భవనాన్ని ముట్టడించారు. పోలీసులు న్యాయవాదులను అరెస్టు చేశారు. వరంగల్ జిల్లాలో జిల్లా విద్యాధికారి ఒకరు కార్యాలయానికి హాజరవడంతో ఆగ్రహించిన తెలంగాణవాదులు కార్యాలయంలోకి చొచ్చుకెళ్లి ఆయనను బయటకు బలవంతంగా పంపించేసి కార్యాలయానికి తాళం వేశారు. లోపలున్న ఫర్నిచర్‌ను ధ్వంసం చేశారు.

English summary

TNGO leader Swamy Goud suggested Telangana employees that do not participate in Sakala Janula Strike after sign. He appealed Telangana settlers to participate in strike.