తెలంగాణ లేదంటే హైదరాబాద్ దిగ్బంధం: హరీష్ రావు

By Srinivas

Published: Monday, September 19, 2011, 14:59 [IST]

మెదక్: కేంద్రం వెంటనే స్పందించి తెలంగాణ రాష్ట్రం ప్రకటించకుంటే హైదరాబాదును దిగ్బంధిస్తామని తెలంగాణ రాష్ట్ర సమితి సిద్దిపేట శాసనసభ్యుడు హరీష్ రావు సోమవారం హెచ్చరించారు. హైదరాబాదును దిగ్బంధించి తెలంగాణ సాధించుకుంటామన్నారు. గతంలో టిఆర్ఎస్ అధ్యక్షుడు కల్వకుంట్ల చంద్రశేఖర రావు నిరాహార దీక్ష, విద్యార్థుల ఆందోళనల కారణంగా కేంద్రం రాత్రి పదకొండు గంటలకు తెలంగాణను ప్రకటించిందని అయితే సీమాంధ్ర ప్రజా ప్రతినిధుల కుట్రల కారణంగా దానిని వెనక్కి తీసుకుందన్నారు. మరోసారి ఉద్యమించి తెలంగాణ సాధిస్తామన్నారు. తెలంగాణ సాధించే వరకు ఉద్యమం ఆగే ప్రసక్తి లేదన్నారు.

తెలంగాణ కోసం ఎన్ని ఇబ్బందులు ఎదురైనా ప్రజలు ఓర్చుకోవడానికి సిద్ధంగా ఉన్నారన్నారు. సింగరేణి కార్మికుల జోలికి వస్తే చూస్తూ ఊరుకునేది లేదన్నారు. రణానికి సిద్ధమవుతున్నామన్నారు. ప్రయివేటు డ్రైవర్లతో బస్సులను బయటకు తీసుకు రావాలని ప్రభుత్వం చూస్తే ఆ బస్సులు తిరిగి డిపోలకు చేరవని హెచ్చరించారు. తెలంగాణ కోసం ప్రజా ప్రతినిధులు రాజీనామా చేయకుంటే ఉద్యమం వారి పైకి మళ్లుతుందని అంతకుముందు కాంగ్రెసు, టిడిపి ప్రజాప్రతినిధులను ఆయన హెచ్చరించారు. సకల జనుల సమ్మెలో భాగంగా తెలంగాణ రాజకీయ ఐక్య కార్యాచరణ సమితి చేపట్టిన రహదారుల దిగ్బంధంలో ఆయన జహీరాబాదులో పాల్గొన్నారు.

Published On September 19, 2011