రాజీనామా చేయకుంటే చీపుర్లతో కొట్టండి: రాములమ్మ

By Srinivas

Published: Monday, September 19, 2011, 12:47 [IST]

మెదక్: తెలంగాణ కోసం రాజీనామా చేయని ప్రజా ప్రతినిధులు గ్రామాలలోకి వచ్చినప్పుడు మహిళలు చీపుర్లు, చెప్పులతో వారిని తరిమి కొట్టాలని తెలంగాణ రాష్ట్ర సమితి పార్లమెంటు సభ్యురాలు విజయశాంతి సోమవారం పిలుపునిచ్చారు. సకల జనుల సమ్మెలో భాగంగా ఆమె మెదక్ జిల్లాలోని జహీరాబాద్ రహదారుల దిగ్బందం కార్యక్రమంలో పాల్గొన్నారు. ఈ సందర్భంగా ఆమె మాట్లాడారు. తెలంగాణ కోసం తెలుగుదేశం, కాంగ్రెసు ప్రజా ప్రతినిధులు అందరూ రాజీనామా చేయాలని డిమాండ్ చేశారు. రాజీనామా చేయని వారికి ప్రజలు తగిన బుద్ధి చెబుతారని హెచ్చరించారు. సమైక్యవాదులారా ఖబర్దార్ అంటూ హెచ్చరించారు. తెలంగాణ ప్రకటించే వరకు ఉద్యమం కొనసాగుతుందన్నారు.

కేంద్రంలో ఎన్డీయే ప్రభుత్వం అధికారంలోకి వస్తేనే తెలంగాణ వస్తుందన్నారు. సకల జనుల సమ్మెను చూసైన కేంద్ర ప్రభుత్వం తెలంగాణపై స్పందించాలన్నారు. సమ్మెకు స్పందించకుంటే వారిని చితకబాదే రోజులు వస్తాయన్నారు. ఉద్యమ సెగ ఢిల్లీకి తాకుతోందన్నారు. తెలంగాణ వ్యతిరేకులను బయటకు రానివ్వవద్దని పిలుపునిచ్చారు. తెలంగాణ కోసం ఉద్యమిస్తున్న వారిని ప్రభుత్వం కుట్రపూరితంగా అరెస్టు చేయిస్తోందని ఆరోపించారు. అరెస్టులు జరుగుతుంటే కాంగ్రెసు ప్రజా ప్రతినిధులు ఎసి గదులకు పరిమితమయ్యారన్నారు. అణిచివేత, అరెస్టులతో తెలంగాణ ఉద్యమాన్ని ఆపలేరన్నారు.

Published On September 19, 2011