సెంటిమెంటుతో ఆటొద్దు: కెకె ఎదుట రవిశంకర్ ప్రసాద్

By Srinivas

Published: Sunday, September 25, 2011, 18:07 [IST]

న్యూఢిల్లీ: నాలుగున్నర కోట్ల తెలంగాణ ప్రజల సెంటిమెంటుతో ఆడుకోవద్దని భారతీయ జనతా పార్టీ అధికార ప్రతినిధి రవిశంకర్ ఆదివారం యుపిఏ ప్రభుత్వానికి సూచించారు. టిజెఏసి ఆధ్వర్యంలో నిర్వహించిన రౌండ్ టేబుల్ సమావేశంలో రవిశంకర్ ప్రసాద్, కాంగ్రెసు పార్టీ రాజ్యసభ సభ సభ్యుడు కె కేశవ రావు, తెలంగాణ నగారా సమితి చైర్మన్ నాగం జనార్ధన్ రెడ్డి, ఎంపీ వివేక్ తదితరులు పాల్గొన్నారు. ఈ సందర్భంగా రవిశంకర్ మాట్లాడారు. ప్రజాస్వామ్యయుతంగా ఎన్నికైన ప్రభుత్వం ప్రజల గొంతు నొక్కడం సరికాదన్నారు. చత్తీస్ ఘడ్‌లో తెలంగాణ అంత డిమాండ్ లేకపోయినా తాము చిన్న రాష్ట్రాలతో పాలన సౌలభ్యంగా ఉంటుందని తాము రాష్ట్రం ప్రకటించామన్నారు. ఎన్డీయే అధికారంలోకి వస్తే తెలంగాణ ఇస్తామన్నారు. తెలంగాణ ఏర్పాటు చేయనప్పుడు డిసెంబర్ 9న కేంద్రమంత్రి చిదంబరం ప్రకటన ఎందుకు చేశారని ప్రశ్నించారు.

సుప్రీం కోర్టు జడ్జి అయి ఉండి జస్టిస్ శ్రీకృష్ణ రహస్య నివేదిక ఇవ్వడం ఏమిటన్నారు. శ్రీకృష్ణ కమిటీని కేంద్రం రాజకీయంగా ఉపయోగించుకుందని ఆరోపించారు. రెండు వారాలుగా సమ్మె ఉధృతంగా జరుగుతున్నప్పటికీ ఒక్క హింసాత్మక సంఘటన చోటు చేసుకోక పోవడం అభినందనీయమన్నారు. తెలంగాణ కోసం జరుగుతున్న మహోద్యమాన్ని ప్రతి ఒక్కరూ గౌరవించాలన్నారు. తెలంగాణ కోసం రాజీనామాలు చేసినప్పుడు స్పీకర్ తిరస్కరించాలి లేదా ఆమోదించాలి. కానీ పెండింగులో పెట్టడం ఎంత వరకు సమంజసమన్నారు.

2001లోనే కాంగ్రెసు వర్కింగ్ కమిటీలో తెలంగాణకు అనుకూలంగా నిర్ణయం తీసుకున్నామని రాజ్యసభ సభ్యుడు కె కేశవరావు అన్నారు. కేంద్రమంత్రి చిదంబరం వ్యాఖ్యలు హాస్యాస్పదంగా ఉన్నాయన్నారు. తెలంగాణ ఉద్యమంపై మీడియా నిర్లక్ష్యం చూపిస్తోందన్నారు. తెలంగాణ కోసం ప్రశాంతంగా పోరు సాగుతుందన్నారు. సిపిఎం పార్టీ తప్ప రాష్ట్రంలోని అన్ని పార్టీలు తెలంగాణకు మద్దతు పలుకుతున్నాయన్నారు.

Published On September 25, 2011