గ్యాస్‌కు ఓకే: ముఖ్యమంత్రికి జైపాల్ రెడ్డి ఝలక్

By Srinivas

Published: Sunday, September 25, 2011, 17:57 [IST]

న్యూఢిల్లీ: కేంద్రమంత్రి జైపాల్ రెడ్డి ముఖ్యమంత్రి కిరణ్ కుమార్ రెడ్డి ఝలక్ ఇచ్చారు. ఆంధ్రప్రదేశ్ రాష్ట్రానికి గ్యాస్ ఇవ్వడానికి కేంద్రం సిద్ధంగా ఉందని జైపాల్ రెడ్డి ఆదివారం ఢిల్లీలో ప్రకటించారు. ఈ మేరకు జైపాల్ రెడ్డి ముఖ్యమంత్రికి ఓ లేఖ రాశారు. ఇప్పటికీ గ్యాస్ కేటాయింపుపై రాష్ట్రమే స్పందించడం లేదని ఆయన పేర్కొన్నారు. గ్యాస్ ఇవ్వవద్దని తన వద్దకు తెలంగాణ ప్రాంత పార్లమెంటు సభ్యులు వచ్చి కోరినట్లు ముఖ్యమంత్రి అనడం సరికాదన్నారు. తన వద్దకు ఏ ఎంపీ వచ్చి గ్యాస్ ఇవ్వవద్దని కోరలేదన్నారు. తాను ఈ నెల 22వ తారీఖునే ముఖ్యమంత్రికి ప్రత్యామ్నాయ విషయమై ఫోన్ చేశానని ఆయనే స్పందించలేదన్నారు.

కాగా తెలంగాణ ప్రాంత ఎంపీలు వెళ్లి రాష్ట్రానికి గ్యాస్ ఇవ్వవద్దని కేంద్ర మంత్రిని జైపాల్ రెడ్డిని కోరారని ముఖ్యమంత్రి ఇటీవల చేసిన వ్యాఖ్యలు తీవ్ర దుమారం రేపిన విషయం తెలిసిందే. ఆయన వ్యాఖ్యలను శనివారమే జైపాల్ రెడ్డి ఖండించారు. ఎంపీలు సైతం ముఖ్యమంత్రిపై తీవ్రస్థాయిలో ధ్వజమెత్తారు. కాగా ఆదివారం గ్యాస్ ఇవ్వడానికి కేంద్రం సిద్ధంగా ఉందని చెప్పడంతో సిఎంకు జైపాల్ రెడ్డి ఝలక్ ఇచ్చినట్లయింది.

Published On September 25, 2011