ఇక చాలు! ఇప్పటికే తెలిసింది: రైలు రోకోపై కోదండరాం

By Srinivas

Published: Sunday, September 25, 2011, 13:22 [IST]

హైదరాబాద్: రైలు రోకో కార్యక్రమం ముందుగా ప్రకటించినట్లుగా ఆదివారం సాయంత్రం ఆరు గంటల వరకే కొనసాగుతుందని తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ ఆదివారం ఉదయం స్పష్టం చేశారు. ఆయన మౌలాలీ స్టేషన్ రైలు రోకో కార్యక్రమంలో పాల్గొన్నారు. రైలు రోకో కార్యక్రమం విజయవంతమైందన్నారు. ఈ కార్యక్రమంతో తెలంగాణ ప్రజల ఆకాంక్ష ఢిల్లీకి మరోమారు తాకిందన్నారు. రైలు రోకోను పొడిగించాల్సిందిగా ప్రజల నుండి విన్నపాలు వచ్చాయని అయితే వాటిని పరిశీలించామన్నారు.

అయితే పండుగలు ఉన్నందున చాలామంది ప్రజలు ప్రయాణాలు పెట్టుకుంటారన్నారు. అలాగే ముందుగా ఎలాంటి నోటీసులు కూడా ఇవ్వలేదన్నారు. అయితే పరిస్థితిని బట్టి మరోమారు నిరవధిక రోకోకు దిగుతామని చెప్పారు. రాజకీయంగా ఇది బలమైన అస్త్రం కాబట్టి కేంద్రం దిగి రాకుంటే మళ్లీ చేపట్టే నిర్ణయం తీసుకుంటామన్నారు. రైలు రోకో కార్యక్రమంలో బిజెపి, టిఆర్ఎస్ నేతలు పాల్గొన్నారని చెప్పారు.

కాగా కోదండరామ్, సిరిసిల్ల శాసనసభ్యుడు కల్వకుంట్ల తారక రామారావుతో పాటు పలువురు తెలంగాణవాదులు ఈ రైలు రోకోలో పాల్గొన్నారు. అయితే ఇక్కడ ఓ పోలీసు వీడియోతో చిత్రీకరిస్తుండగా ఆగ్రహించిన తెలంగాణవాదులు పోలీసుపై దాడి చేసి కెమెరాను ధ్వంసం చేశారు.

Published On September 25, 2011