'తెలంగాణ' ఉధృతానికి కారణం అవే: లోక్‌సత్తా జెపి

By Srinivas

Published: Sunday, September 25, 2011, 8:53 [IST]

న్యూఢిల్లీ: రాష్ట్రంలో తెలంగాణ ఉద్యమం ఉధృతం కావడానికి కారణం జాతీయ పార్టీలేనని లోక్ సత్తా అధ్యక్షుడు జయ ప్రకాశ్ నారాయణ శనివారం న్యూఢిల్లీలో ఆరోపించారు. లోక్‌పాల్ బిల్లుపై పార్లమెంటు స్థాయీ సంఘంతో చర్చించేందుకు ఆయన ఢిల్లీ వచ్చారు. ఈ సందర్భంగా ఆయన ఎపి భవనంలో మాట్లాడారు. సమ్మె వల్ల రెక్కాడితే గానీ డొక్కాడని పేదలు ఇక్కట్ల పాలవుతున్నారన్నారు. రవాణా వ్యవస్థ నిలిచి పోవడం వల్ల ప్రజలపై తీవ్ర ప్రభావం పడుతోందని నిత్యావసర ధరలు పెరుగుతాయన్నారు. తెలంగాణపై మొదట శాసనసభలో చర్చ జరగాలని అభిప్రాయపడ్డారు. సకల జనుల సమ్మె వల్ల సామాన్య ప్రజలే నష్టపోతున్నారని మొహం బాగా లేదని ముక్కు కోసుకోవటం వల్ల మనకే నష్టమన్నారు.

రాష్ట్రాల్లో విధిగా లోకాయుక్తలు ఏర్పాటు చేయాలని, కేంద్ర విజిలెన్స్ కమిషన్‌ను కొనసాగించాలని, సిబిఐ, ఎసిబిలకు స్వతంత్ర ప్రతిపత్తి కల్పించాలని తాను స్థాయీ సంఘం భేటీలో సూచించినట్లు చెప్పారు. సిబిఐ, ఎసిబిలకు పట్టుబడ్డ అవినీతిపరుల ఆస్తుల్ని జప్తు చేయాలని, ఇందుకోసం ఒక ప్రత్యేక చట్టం తీసుకు రావాలని కూడా తాను కోరినట్లు చెప్పారు. అన్నాహజారే బృందం ప్రతిపాదించిన జన్ లోక్‌పాల్ బిల్లు రాజ్యాంగేతర సంస్థగా మారుతుందని ఇది దేశానికి ప్రమాదమని జెపి అన్నారు. బలమైన లోక్‌పాల్ వ్యవస్థ అవసరమే కానీ జన్ లోక్‌పాల్ సరికాదన్నారు.

Published On September 25, 2011