నరకడం మొదలు పెడితే.., చెప్పడానికే సిగ్గు: పొన్నం

By Srinivas

Published: Sunday, September 25, 2011, 14:25 [IST]

హైదరాబాద్: తాము తలలు నరకడం మొదలు పెడితే సీమాంధ్ర అహంకార ప్రజాప్రతినిధుల తలలు తెగిపడతాయని కానీ తాము మహాత్మా గాంధీ చూపిన శాంతిమార్గంలో ఉద్యమం చేస్తున్నామని కరీంనగర్ పార్లమెంటు సభ్యుడు పొన్నం ప్రభాకర్ ఆదివారం అన్నారు. శ్రీ పొట్టి శ్రీరాములు నెల్లూరు జిల్లా శాసనసభ్యుడు ఆనం వివేకానంద రెడ్డికి కోడి తల నరకడం కూడా తెలియదా అని ఎద్దేవా చేశారు. తెలంగాణ ప్రాంతంలో కరెంటు కట్ చేస్తున్న ట్రాన్సుకో ఎండి సంగతి తేలుస్తామన్నారు. తెలంగాణ అంశం చివరి దశకు చేరుకుందన్నారు.

తెలంగాణపై కేంద్రం వెంటనే నిర్ణయం తీసుకోవాలన్నారు. లేదంటే తాము రాజీనామాలు చేస్తామన్నారు. ప్రకటన రాకపోతే రాజీనామాలే శరణ్యమన్నారు. సమ్మె ప్రభావం కనిపించలేదంటున్న ముఖ్యమంత్రి కిరణ్ కుమార్ రెడ్డి తమ పార్టీ నేతగా చెప్పుకోవడానికే సిగ్గుగా ఉందన్నారు. ముఖ్యమంత్రి ఎలా అయ్యారో చెప్పమంటే ఆయనకు కోపమొచ్చిందన్నారు. ఆయనపై తానేమి తప్పుగా మాట్లాడలేదన్నారు.

Published On September 25, 2011