తెలంగాణ అప్పగించండి చూసుకుంటాం: సీమ నేతలు

హైదరాబాద్: రాయలసీమను రెండుగా విభజిస్తారని వస్తున్న వాదనలపై సీమ నేతలు ఆగ్రహం వ్యక్తం చేస్తున్నారు. తెలంగాణ ఉద్యమం నుంచి ఒక్కొక్కరు దూరం అవుతున్నారనే నిరుత్సాహంతోనే తెలంగాణ రాష్ట్ర సమితి అధ్యక్షుడు, మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావు ఇష్టం వచ్చినట్లుగా మాట్లాడుతున్నారని తెలుగుదేశం పార్టీ సీనియర్ శాసనసభ్యుడు పయ్యావుల కేశవ్ గురువారం ఆగ్రహం వ్యక్తం చేశారు. సీమ జోలికొస్తే అనంతపురం పౌరుషం చూపిస్తామని హెచ్చరించారు. ఉద్యమం నీరుగారే దశకు చేరుకుందన్నారు. ఆ నిరుత్సాహంతోనే కెసిఆర్ ఏమేమో మాట్లాడుతున్నారన్నారు.

రాయలసీమను రెండుగా విభజిస్తే ఖబర్దార్ అని టిడిపి మరో నేత బైరెడ్డి రాజశేఖర రెడ్డి హెచ్చరించారు. తెలంగాణ అంశం బాధ్యతను మాకు అప్పగిస్తే మేం చూసుకుంటామన్నారు. సమైక్యాంధ్ర ఉద్యమాన్ని నీరుగార్చేలా చిన్న నీటిపారుదల శాఖ మంత్రి టిజి వెంకటేష్ మాట్లాడుతున్నారని ఆరోపించారు. రాయలసీమను ఆరో జోన్‌లో కలపాలనుకోవడం సరికాదన్నారు. కాగా రాయలసీమలోని అనంతపురం, కర్నూలు జిల్లాలను తెలంగాణ ప్రాంతంలో కలుపుతూ రాష్ట్రాన్ని విభజిస్తామనే ప్రతిపాదనలు వస్తున్నాయనే వాదనలు వినిపిస్తున్న నేపథ్యంలో సీమ నేతలు ఆగ్రహం వ్యక్తం చేస్తున్నారు.

English summary

Seemandhra leaders very angry at central government for two state proposal.