గాలి ఆడిటర్ రుక్మిణి, సెక్రటరీలపై లుకౌట్ నోటీసు

By Srinivas

Published: Friday, September 30, 2011, 9:21 [IST]

హైదరాబాద్: కర్నాటక మాజీ మంత్రి, భారతీయ జనతా పార్టీ సీనియర్ శాసనసభ్యుడు గాలి జనార్ధన్ రెడ్డి ఆడిటర్‌పై, ఆయన వ్యక్తిగత కార్యదర్శులపై సిబిఐ అధికారులు లుకౌట్ నోటీసులు జారీ చేసినట్లుగా తెలుస్తోంది. గాలి ఆడిటర్ రుక్మిణితో పాటు ఆయన వ్యక్తిగత కార్యదర్శుల పేర్ల మీద ఈ లుకౌట్ నోటీసులు వెలువడ్డాయి. గాలి జనార్ధన్ రెడ్డి అరెస్టయినప్పటి నుండి వీరంతా అజ్ఞాతంలోకి వెళ్లారు. దీంతో ఈ కేసులో వీరు కీలకమని భావించిన సిబిఐ అధికారులు వారు విదేశాలకు పారిపోకుండా ఉండేందుకు దేశంలోని అన్ని విమానాశ్రయాలకూ లుకౌట్ నోటీసులు జారీ చేశారు. వారి పేర్ల మీద గాలి బినామీ ఆస్తులు ఉన్నాయని సిబిఐ అధికారులు అనుమానాలు వ్యక్తం చేస్తున్నట్లుగా కనిపిస్తోంది. అందువల్లే వారిపై నోటీసులు జారీ చేశారు.

గాలి అక్రమ మైనింగుకు సంబంధించిన లావాదేవీలు, పంపకాలు, డబ్బు పంపిణీ తదితరాలు వీరు దగ్గరే ఉండి చూసుకునే వారని సిబిఐ దర్యాఫ్తులో తేలింది. గాలికి ప్రధాన అనుచరులుగా ఉన్న స్వస్తిక్ నాగరాజు, మహేష్‌లు అజ్ఞాతం వీడి బయటకు వచ్చాక రుక్మిణీ తదితరులు సైతం వస్తారని సిబిఐ భావించినట్లుగా తెలుస్తోంది. అయితే వీరు ఇప్పటికీ అజ్ఞాతం వీడి బయటకు రాక పోవడంతో లుకౌట్ నోటీసులు జారీ చేసింది. అక్రమ మైనింగులో ముడుపులు ఎవరెవరికి అందాయనే అంశం తేల్చాలన్నా వారు బయటకు రావాల్సిందేనని సిబిఐ భావిస్తోంది. కాగా కర్నాటకలోని 40 గనులకు లైసెన్సులు రద్దు చేసినట్లుగా తెలుస్తోంది.

Published On September 30, 2011