సిబిఐ విచారణ చేయిస్తే కెసిఆర్‌కు గాలి గతే: మోత్కుపల్లి

By Srinivas

Published: Friday, September 30, 2011, 14:23 [IST]

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు తనకు కర్నాటక మాజీ మంత్రి, భారతీయ జనతా పార్టీ సీనియర్ శాసనసభ్యుడు గాలి జనార్ధన్ రెడ్డి గతి పడుతుందనే ఉద్దేశ్యంతోనే కాంగ్రెసుతో కుమ్మక్కయ్యారని తెలుగుదేశం పార్టీ సీనియర్ శాసనసభ్యుడు మోత్కుపల్లి నర్సింహులు శుక్రవారం ధ్వజమెత్తారు. ఆయన తన అవినీతి బయట పడకుండా ఉండటానికే కాంగ్రెసుతో కలిసి పని చేస్తున్నారన్నారు. ఆయనపై సిబిఐ విచారణ జరిపిస్తే గాలి గతి పట్టడం ఖాయమన్నారు.

తెలంగాణలో తెలుగుదేశం పార్టీని సర్వనాశనం చేయాలనే కుట్రతోనే కెసిఆర్, కాంగ్రెసులు ఉన్నారని మాజీ మంత్రి దేవేందర్ గౌడ్ ఆరోపించారు. తెలంగాణపై ప్రజలను కెసిఆర్, కాంగ్రెసులు మభ్యపెడుతూ క్రమంగా టిడిపిని తొలగించుకోవాలని మాస్టర్ ప్లాన్ వేశారన్నారు. రాష్ట్రంలో కాంగ్రెసు బలహీనపడకుండా కెసిఆర్ జాగ్రత్తలు తీసుకుంటున్నారని విమర్శించారు. కాంగ్రెసు, కెసిఆర్ మ్యాచ్ ఫిక్సింగ్‌కు జెఏసి ముసుగులా పని చేస్తోందన్నారు. రాష్ట్రంలో అసలు ప్రభుత్వం ఉన్నట్లుగా కనిపించడం లదేన్నారు. ప్రస్తుత అనిశ్చితికి కాంగ్రెసు, టిఆర్ఎస్సే కారణమన్నారు.

Published On September 30, 2011