నేనూ తెలంగాణ బిడ్డనే: రేణుకా చౌదరి

By Pratap

Published: Friday, September 30, 2011, 17:52 [IST]

న్యూఢిల్లీ: తానూ తెలంగాణ బిడ్డనేనని ఏఐసిసి అధికార ప్రతినిధి రేణుకా చౌదరి శుక్రవారం న్యూఢిల్లీలో అన్నారు. తెలంగాణపై తనకు మాట్లాడే హక్కు లేదా అని ప్రశ్నించారు. తెలంగాణపై తాను ఏం మాట్లాడినా కొందరు అనవసరమైన విమర్శలు చేస్తున్నారన్నారు. నాపై కుట్రతోనే ఇలాంటి వ్యాఖ్యలు చేస్తున్నారన్నారు. తెలంగాణపై తానేమీ తప్పు మాట్లాడలేదన్నారు. తెలంగాణ ఎప్పుడో వచ్చేసిందని ఆ విషయం ఎవరికీ అర్థం కావడం లేదన్నారు. కాగా ఇటీవల సకల జనుల సమ్మె ప్రభావం అంతగా లేదని, రాష్ట్రంలో 80 శాతానికి పైగా పనులు జరుగుతున్నాయని రేణుకా చౌదరి వ్యాఖ్యానించడంతో తెలంగాణవాదులు మండిపడిన విషయం తెలిసిందే. అయితే ఆ తర్వాత రోజే అమె వివరణ ఇచ్చుకున్నారు.

మరోవైపు తెలంగాణ అంశంపై భారతీయ జనతా పార్టీ పదాధికారుల సమావేశంలోనూ చర్చకు వచ్చింది. తెలంగాణపై కాలాయాపన చేయడం శ్రేయస్కరం కాదని ఆ పార్టీ జాతీయ అధ్యక్షుడు నితిన్ గడ్కరీ సమావేశంలో అభిప్రాయపడ్డారు. తెలంగాణలోని పది జిల్లాల్లో రెండు వారాలుగా సమ్మె జరుగుతున్నప్పటికీ కేంద్రం స్పందించక పోవడం శోచనీయమన్నారు. ఈ వ్యవహారంలో జాతీయ కాంగ్రెసు నిమ్మకు నీరెత్తినట్లు వ్యవహరిస్తోందని విమర్శించారు. తెలంగాణ కోసం 650 మంది యువకులు ఆత్మర్పణం చేశారన్నారు.

Published On September 30, 2011