వైయస్ జగన్ గూటికి చేరిన వంగవీటి రాధాకృష్ణ

By Pratap

Published: Saturday, October 1, 2011, 13:31 [IST]

విజయవాడ: మాజీ శాసనసభ్యుడు వంగవీటి రాధాకృష్ణ వైయస్ జగన్ నాయకత్వంలోని వైయస్సార్ కాంగ్రెసు పార్టీ గూటికి చేరారు. వంగవీటి రాధ శనివారంనాడు వైయస్ జగన్‌ను కలిశారు. వంగవీటి మోహన రంగా విగ్రహానికి జగన్ శనివారంనాడు పూలమాల వేసి నివాళులు అర్పించారు. ఈ కార్యక్రమంలో రాధా కూడా పాల్గొన్నారు. రాధాను వైయస్ జగన్ ఆలింగనం చేసుకున్నారు. కాంగ్రెసు పార్టీకి చెందిన వంగవీటి రాధా చిరంజీవి పార్టీని స్థాపించినప్పుడు ప్రజారాజ్యంలోకి వెళ్లారు. చిరంజీవి తన పార్టీని విలీనం చేసినప్పుడు మిగతా ప్రజారాజ్యం పార్టీ నాయకులతో పాటు ఆయన కాంగ్రెసులో చేరలేదు. విజయవాడలో రైతు ధర్నాలో కూడా వంగవీటి రాధా పాల్గొన్నారు.

ప్రజారాజ్యం పార్టీని విలీనం చేయాలని నిర్ణయం తీసుకోవడానికి చాలా ముందు రోజుల నుంచే రాధాకృష్ణ చిరంజీవికి దూరంగా ఉంటున్నారు. చిరంజీవి ఆయనకు నచ్చజెప్పే ప్రయత్నం కూడా చేశారు. విజయవాడ రాజకీయాల సమీకరణాల నేపథ్యంలో ఇటు కాంగ్రెసులోనూ అటు తెలుగుదేశంలోనూ ఇమిడే పరిస్థితి లేకపోవడంతో ఆయన వైయస్సార్ కాంగ్రెసు పార్టీ వైపు చూస్తున్నట్లు చెబుతున్నారు. ఆ మధ్య విజయవాడ పర్యటలో పిసిసి అధ్యక్షుడు బొత్స సత్యనారాయణ వంగవీటి మోహనరంగా విగ్రహానికి నివాళులు అర్పిస్తారని భావించారు. కానీ, బొత్స అటువైపు వెళ్లలేదు. దీంతో కాంగ్రెసుపైన కూడా వంగవీటి రాధాకృష్ణ తీవ్ర అసంతృప్తి చెందారు.

Published On October 1, 2011