కెసిఆర్, కోదండరామ్‌లపై నెపం నెట్టిన ముఖ్యమంత్రి

హైదరాబాద్: రాష్ట్రంలో విద్యుత్తు కోతపై ముఖ్యమంత్రి కిరణ్ కుమార్ రెడ్డి తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు, కోదండరామ్‌లను తప్పు పట్టారు. విద్యుత్తు కోత వల్ల పంటలు నష్టపోవడానికి కెసిఆర్, కోదండరామ్‌లే కారణమని ఆయన అన్నారు. ఆదిలాబాదు జిల్లా నుంచి వచ్చిన కాంగ్రెసు పార్టీ కార్యకర్తలను ఉద్దేశించి ఆయన సోమవారం మాట్లాడారు. విద్యుత్ కోత వల్ల 70 లక్,ల ఎకరాల్లో సాగుకు ఆటంకం కలుగుతోందని ఆయన అన్నారు. రైతలను ఇబ్బంది పెడుతూ వారికి నష్టం కలిగించే చర్యలకు వారిద్దరు పాల్పడుతున్నారని ఆయన ఆరోపించారు. కెసిఆర్, కోదండరామ్ ప్రయత్నాలను తిప్పికొట్టాలని ఆయన ప్రజలకు పిలుపునిచ్చారు.

కీలకమైన దశలో పంటలకు నీరందకుండా చేసి రైతుల ఉసురు పోసుకోవద్దని ఆయన కెసిఆర్, కోదండరామ్‌లకు సూచించారు. నష్టాల్లో ఉన్న ఆర్టీసిని శ్రమపడి లాభాల బాట పట్టించామని, సమ్మె వల్ల పరిస్థితి మళ్లీ మొదటికి వస్తుందని ఆయన అన్నారు. విధుల్లోకి రావాలని ఆయన సింగరేణి కార్మికులను, ఆర్టీసి ఉద్యోగులను కోరారు. తెలంగాణకు ఎవరూ వ్యతిరేకం కాదని, నిర్ణయం వచ్చే వరకు సహనం వహించాలని ఆయన సూచించారు. ప్రాణహిత - చేవెళ్ల ప్రాజెక్టుకు జాతీయ హోదా కల్పించాలని కేంద్ర ప్రభుత్వంపై ఒత్తిడి పెడుతున్నట్లు ఆయన తెలిపారు.

English summary

CM Kiran Kumar Reddy blamed TRS president K chandrasekhar rao and Telangana JAC chairman Kodandaram for power cut.