ప్రణబ్ ముఖర్జీపై తెలంగాణ కాంగ్రెసు ఎంపీల ధ్వజం

By Srinivas

Published: Wednesday, October 5, 2011, 15:04 [IST]

న్యూఢిల్లీ/హైదరాబాద్: కేంద్ర మంత్రి ప్రణబ్ ముఖర్జీ వ్యాఖ్యలపై తెలంగాణ ప్రాంత కాంగ్రెసు ప్రజా ప్రతినిధులు బుధవారం తీవ్రస్థాయిలో మండి పడ్డారు. తెలంగాణను ఇప్పట్లో తేల్చలేమన్నట్లు మాట్లాడిన ప్రణబ్ వ్యాఖ్యలు చాలా బాధాకరమని రాజ్యసభ సభ్యుడు వి హనుమంత రావు న్యూఢిల్లీలో అన్నారు. ప్రణబ్‌ను తాము మరోసారి కలిసి తెలంగాణ ప్రజల ఆకాంక్ష ఆయన వివరణ కోరతామన్నారు. ఆయన వ్యాఖ్యలపై సీమాంధ్ర ప్రజా ప్రతినిధుల ప్రభావం ఉంటుందని తాను అనుకోవడం లేదన్నారు. దేశంలోని మిగతా రాష్ట్రాలకు తెలంగాణకు పోలిక లేదన్నారు. తెలంగాణ ఇదివరకే ప్రత్యేక రాష్ట్రమన్నారు. ప్రధానమంత్రి మన్మోహన్ సింగ్ కూడా గతంలో మిగతా రాష్ట్రాలకు తెలంగాణకు పోలిక లేదని చెప్పిన విషయాన్ని విహెచ్ గుర్తు చేశారు.

చిన్న రాష్ట్రాల నివేదికను కేంద్రానికి ఇచ్చిన ప్రణబ్ తెలంగాణపై ఇప్పుడు ఇలా మాట్లాడటం సరికాదని పెద్దపల్లి శాసనసభ్యుడు వివేక్ హైదరాబాదులో అన్నారు. రాష్ట్రపతి ప్రసంగంలో తెలంగాణ అంశం చేర్చింది కూడా కాంగ్రెస్సే అన్నారు. 2004లో తెలంగాణ రాష్ట్ర సమితితో పొత్తు ప్రత్యేక రాష్ట్ర ఉద్దేశ్యంతో పెట్టుకున్నదే అన్నారు. పార్టీలో ఉండాలో లేదే మరోసారి ఢిల్లీ వెళ్లి తేల్చుకుంటామని చెప్పారు. తెలంగాణను గూర్ఖాలాండ్‌తో పోల్చవద్దని మరో నేత పాల్వాయి గోవర్దన్ రెడ్డి సూచించారు. తెలంగాణ కోసం జరుగుతున్న తరహా ఉద్యమం మరెక్కడా జరగలేదన్నారు. తెలంగాణ ఇస్తేనే రాష్ట్రంలో పార్టీ బతుకుతుందని లేదంటే తాము గ్రామాలలోకి వెళ్లే పరిస్థితి లేదన్నారు.

Published On October 5, 2011