లగడపాటిపై కేసెందుకు పెట్టరు: సిఎంకు కోదండరామ్

By Srinivas

Published: Tuesday, October 11, 2011, 14:35 [IST]

హైదరాబాద్: తెలంగాణ ప్రాంత ఉద్యోగులను రెచ్చగొడుతున్న విజయవాడ పార్లమెంటు సభ్యుడు లగడపాటి రాజగోపాల్‌పై పోలీసులు కేసు ఎందుకు పెట్టడం లేదని తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ మంగళవారం ఇందిరాపార్కు వద్ద జరిగిన ఉద్యోగుల మహాధర్నాలో ముఖ్యమంత్రి కిరణ్ కుమార్ రెడ్డిని ప్రశ్నించారు. ముఖ్యమంత్రి గాలి బుడగకు ఢిల్లీ నేతలు గాలి తీశారని ఎద్దేవా చేశారు. తెలంగాణ కోసం ఉద్యమిస్తున్న ఉద్యోగ నేతలను భయపెట్టాలని ప్రభుత్వం చూస్తోందని విమర్శించారు. ముఖ్యమంత్రి నిరాశతోనే ప్రకటనలు చేస్తున్నారన్నారు. తెలంగాణ వచ్చేదాకా సమ్మె ఉపసంహరించుకునే ప్రసక్తి లేదన్నారు. రాష్ట్ర ప్రభుత్వం తెలంగాణను జైలులా మార్చి వేస్తోందన్నారు.

సకల జనుల సమ్మె విచ్ఛిన్నం చేయడానికి కుట్ర జరుగుతోందన్నారు. తెలంగాణ ఆర్టీసి కార్మికులు సమ్మె విరమిస్తే బస్సులు ఎక్కడ తిరుగుతున్నాయో చెప్పాలన్నారు. త్వరలో తెలంగాణపై ఓ నిర్ణయం వస్తుందని ఆశాభావం వ్యక్తం చేశారు. ఉద్యోగులను రెచ్చగొట్టే చర్యలకు ప్రభుత్వం స్వస్తీ పలకాలన్నారు. అందరూ కలిసుండాలని చెబుతున్న మాపై కేసులు ఎందుకు పెడుతున్నారని ప్రశ్నించారు. ప్రభుత్వం బలహీనపడిందని పోలీసులే చెబుతున్నారన్నారు. అంతకుముందు ఎమ్మెల్యే క్వార్టర్సులో జెఏసి భేటీ అనంతరం కోదండరామ్ మీడియాతో మాట్లాడుతూ రైలు రోకోను ఈ నెల 15, 16, 17కు వాయిదా వేస్తున్నట్లు చెప్పారు.

శాంతియుతంగా జరుగుతున్న ఉద్యమాన్ని ప్రభుత్వం హింసవైపు మళ్లించే ప్రయత్నాలు చేయడం సరికాదని సిరిసిల్ల శాసనసభ్యుడు కెటి రామారావు వేరుగా అన్నారు. తెలంగాణ ప్రజల సహనాన్ని పరీక్షించవద్దని హెచ్చరించారు. ధర్నాలు చేస్తే కేసులు పెడతారా అని ప్రశ్నించారు. ముఖ్యమంత్రి పచ్చి అవకాశవాదన్నారు. ప్రజల ఆకాంక్షలు నెరవేర్చడంలో ముఖ్యమంత్రి పూర్తిగా విఫలమయ్యారని తెలంగాణ వారిని రెచ్చగొట్టేలా మాట్లాడాని మంత్రి టిజి వెంకటేష్, రేణుకా చౌదరి తదితరులపై కేసులు ఎందుకు పెట్టరన్నారు. తెలంగాణ మంత్రులు ప్రభుత్వానికి మద్దతు ఎందుకు ఉహసంహరించడం లేదన్నారు.

Published On October 11, 2011