సమ్మెలో అరెస్టయితే నో బెయిల్ ఇక కోర్టుకే?

By Srinivas

Published: Thursday, October 13, 2011, 9:47 [IST]

హైదరాబాద్: సకల జనుల సమ్మెలో పాల్గొని అరెస్టయ్యే ఆందోళనకారులపై మరింత కఠినంగా వ్యవహరించేందుకు ప్రభుత్వం పూనుకున్నట్లుగా తెలుస్తోంది. తెలంగాణవ్యాప్తంగా జరుగుతున్న సమ్మెలో పాల్గొని అరెస్టయ్యే వారికి బెయిలు ఇవ్వకూడదని పోలీసు శాఖ ఆదేశించినట్లుగా తెలుస్తోంది. తెలంగాణ జేఏసీ రాస్తారోకోలు, బస్సులపై దాడులు, రైల్‌రోకోలు చేస్తున్న నేపథ్యంలో పోలీసు శాఖ ఇలాంటి నిర్ణయం తీసుకున్నట్లు తెలిసింది. సమ్మెతో ఇబ్బందులు ఎదుర్కొంటున్న ప్రజలు ఆందోళనకారులపై ఎందుకు చర్యతీసుకోవడం లేదని పోలీసు శాఖను ఎక్కడికక్కడ ప్రశ్నిస్తున్నారట. దీనితో, ఉన్నతాధికారులు కూడా పునరాలోచనలో పడి కఠిన నిర్ణయాలు తీసుకునేందుకు సిద్ధమైనట్లుగా కనిపిస్తోంది. ఉద్యమకారులతో ఘర్షణ వాతావరణం ఏర్పడడం డీజీపీ దినేశ్ రెడ్డికి ఇష్టం లేకపోవడం కూడా, పోలీసుల మెతక వైఖరికి ఒక కారణమని పోలీసు వర్గాలు అంటున్నాయి.

అయితే, ఇప్పుడు ప్రభుత్వం స్వరం మారింది. గొంతులో ధృఢత్వం చోటు చేసుకుంటున్నది. దానితో, దినేశ్ వైఖరిలో కూడా మార్పు వచ్చిందని అంటున్నారు. ప్రభుత్వ, ప్రైవేటు ఆస్తులకు నష్టం కలిగించే చర్యలకు పాల్పడేవారిని ఇక ఉపేక్షించవద్దని ఉన్నతాధికారులు గ్రీన్ సిగ్నల్ ఇవ్వటంతో, ఇకపై నమోదయ్యే కేసులు ఎటువంటివైనా, నిందితులను రిమాండ్‌కు పంపాలని పోలీస్ స్టేషన్లకు స్పష్టమైన ఆదేశాలు వెళ్లినట్లు సమాచారం. నెల రోజుల సకల జనుల సమ్మెలో తెలంగాణ వ్యాప్తంగా చాలా కేసులు నమోదయ్యాయి. ఇప్పటిదాకా ఐపీసీ సెక్షన్ల కింద అరెస్టయిన వారికి స్టేషన్ బెయిల్ ఇచ్చేవారు. ఇక ముందు ఆ విధంగా స్టేషన్ బెయిల్ ఇవ్వరని తెలుస్తోంది. ఇకపై కచ్చితంగా రిమాండుకు పంపించనున్నట్లు సమాచారం. ముఖ్యమంత్రి కిరణ్ కుమార్ రెడ్డి ఢిల్లీ వెళ్లి వచ్చాక ఆందోళనకారుల పట్ల కఠినంగా వ్వవహరిస్తామని ప్రకటించారు కూడా.

Published On October 13, 2011