అన్నాహజారే మద్దతుదారులపై శ్రీరాం సేన మరోసారి దాడి

By Pratap

Published: Thursday, October 13, 2011, 18:09 [IST]

న్యూఢిల్లీ: ప్రముఖ సంఘ సంస్కర్త అన్నాహజారే మద్దతుదారులపై గురువారం మరోసారి దాడి జరిగింది. ఢిల్లీలోని పాటియాలా కోర్టు హౌస్ ప్రాంగణంలోనే అన్నాహజారే మద్దతుదారులను శ్రీరాం సేన కార్యకర్తలు చితక బాదారు. అన్నా మద్దతుదారుల పైన వారు దాడి చేస్తుండగా పోలీసులు ప్రేక్షక పాత్ర వహించినట్లుగా ఆరోపణలు వినపడుతున్నాయి. ప్రముఖ సుప్రీం కోర్టు లాయరు ప్రశాంత్ భూషణ్‌పై దాడి చేసిన ముగ్గురిని వెంటనే విడుదల చేయాలని డిమాండ్ చేస్తూ వారు ఈ దాడికి పూనుకున్నారు. అందరూ చూస్తుండగానే ఈ సంఘటన జరగడం విశేషం.

కాగా బుధవారం ప్రశాంత్ భూషణ్ పైన శ్రీరాం సేన్ కార్యకర్తలు ముగ్గురు దాడి చేసిన విషయం తెలిసిందే. కాశ్మీర్ పైన ప్రశాంత్ భూషణ్ చేసిన వ్యాఖ్యలను నిరసిస్తూ వారు ఆయనపై దాడి చేశారు. సుప్రీం కోర్టులోని ఆయన ఛాంబరులోకి అపాయింటుమెంటు ఉందని చెప్పి ప్రవేశించిన ముగ్గురు ఆయనను తీవ్రంగా కొట్టారు. అందులో ఇద్దరు పారిపోగా ఒకరిని అప్పుడే పోలీసులు అదుపులోకి తీసుకున్నారు. మిగిలిన ఇద్దరిని పోలీసులు గురువారం అదుపులోకి తీసుకున్నారు. కాగా ప్రశాంత్ భూషణ్‌పై దాడి చేసిన వారికి కోర్టు ఒకరోజు జ్యూడిషియల్ కస్టడీ విధించింది.

Published On October 13, 2011