కుట్రలు చేసినా తెలంగాణ సాధిస్తాం: రాములమ్మ

By Srinivas

Published: Monday, October 17, 2011, 0:12 [IST]

హైదరాబాద్: కాంగ్రెసు ప్రభుత్వం తెలంగాణ ఉద్యమాన్ని అణిచివేయాలని ఎన్నికుట్రలు చేసినా ప్రత్యేక తెలంగాణ రాష్ట్రం సాధించి తీరుతామని తెలంగాణ రాష్ట్ర సమితి మెదక్ జిల్లా పార్లమెంటు సభ్యురాలు విజయశాంతి ఆదివారం అన్నారు. శనివారం రైలు రోకోలో పాల్గొన్న విజయశాంతిని పోలీసులు అరెస్టు చేసిన విషయం తెలిసిందే. ఆమెను రైల్వే కోర్టు రూ.పదివేలు, ఇద్దరి పూచీకత్తుపై ఆదివారం ఉదయం విడుదల చేసింది. అనంతరం ఆమె మీడియాతో మాట్లాడారు. తనకు, అరెస్టైన తెలంగాణ నేతలకు బెయిలు రాకుండా చూడాలని రాష్ట్ర ప్రభుత్వం కుట్రలు పన్నిందని ఆరోపించారు. అయితే దేవుడు తమ పక్షాన ఉండటంతో వారి కుట్రలు ఫలించలేదన్నారు.

ప్రభుత్వం మాపై కావాలనే కేసులు పెడుతోందని ఆరోపించారు. ఎన్ని కుట్రలు చేసినా ఉద్యమం నుండి వెనుకడుగు వేసేది లేదన్నారు. తెలంగాణ ప్రాంత మంత్రులకు చిత్తశుద్ధి లేదన్నారు. ఏఐసిసి అధ్యక్షురాలు సోనియా గాంధీ వద్దకు వెళ్లి తెలంగాణ ఇవ్వమని ఎందుకు అడగడం లేదని ఆమె కాంగ్రెసు నేతలను ప్రశ్నించారు. ముఖ్యమంత్రి కిరణ్ కుమార్ రెడ్డి, డిజిపి దినేష్ రెడ్డిల తీరుపై లోకసభ స్పీకరు మీరాకుమార్‌కు ఫిర్యాదు చేస్తానని చెప్పారు.

Published On October 17, 2011