తెలంగాణలో చాన్నాళ్ల తర్వాత చంద్రబాబుకు అవకాశం

By Srinivas

Published: Tuesday, October 25, 2011, 11:47 [IST]

హైదరాబాద్: తెలంగాణపై స్పష్టమైన వైఖరి తీసుకోని కారణంగా సకల జనుల సమ్మె కాలంలో ఆ ప్రాంతంలో తెలుగుదేశం పార్టీ పరిస్థితి ఆశాజనకంగా ఏమీ కనిపించలేదు. సమ్మె కాలంలోనే కాదు ఉద్యమం గత రెండేళ్లుగా ప్రజల్లోకి వెళ్లడంతో పార్టీ పరిస్థితి అప్పటి నుండే అగమ్య గోచరంగా మారింది. వేములవాడ శాసనసభ్యుడు సిహెచ్ రమేష్‌తో ప్రారంభమైన రాజీనామాల పరంపర గంప గోవర్ధన్ వరకు కొనసాగుతోంది. ఉద్యమం ఇలాగే ఉంటే మరికొందరూ పార్టీ నుండి బయటకు వచ్చే వారే. కానీ అనూహ్యంగా తెలుగుదేశం పార్టీకి పోలవరం టెండర్లు అంశం కలిసి వచ్చింది. పోలవరం టెండర్లలో తెలంగాణ రాష్ట్ర సమితి హస్తం ఉందన్న ఆరోపణలు తీవ్రంగా చెలరేగటంతో నిన్నటి వరకు ఉన్న ఊపు ఇప్పుడు ఆ పార్టీలో కనిపించడం లేదు. పోలవరం అంశం టిడిపికి అనుకోకుండా కలిసి వచ్చింది.

దీంతో ఇన్నాళ్లూ నిస్తేజంగా కనిపించిన తెలంగాణ తెలుగుదేశం పార్టీ క్యాడర్‌లో కొత్త ఉత్సాహం తీసుకు వచ్చేందుకు ఆ పార్టీ చీఫ్ నారా చంద్రబాబు నాయుడు నిర్ణయించుకున్నట్లుగా తెలుస్తోంది. అనుకున్నదే తడవుగా తెలంగాణ టిడిపి నేతలను ఆదేశించారట. అనుకోని విధంగా కలిసి వచ్చిన పోలవరం టెండర్ల అంశాన్ని ప్రజల్లోకి తీసుకు వెళ్లి టిఆర్ఎస్ రాజకీయ ప్రయోజనాల కోసమే తెలంగాణ సెంటిమెంటును అడ్డు పెట్టుకుంటున్నదని తెలియజెప్పాలని సూచించారట. వచ్చిన అవకాశాన్ని ఇప్పుడే ఉపయోగించుకోవాలని తద్వారా తెలంగాణలో పార్టీ కార్యకర్తల్లో ఉత్తేజం నింపాలని బాబు నేతలకు సూచించారట. ఇన్నాళ్లూ రాని అవకాశం ఇప్పుడు రావడంతో తెలంగాణ నేతలు సైతం క్యాడర్‌లో ఉత్సాహం నింపడానికి ఈ నెల 28 నుండి జిల్లాల్లో తెలంగాణ సాధనా సభలు ఏర్పాటు చేయనున్నారు.

తెలంగాణకు నష్టం చేసే పోలవరం ప్రాజెక్టును బయటకు వ్యతిరేకిస్తూనే లోలోన టిఆర్ఎస్ తనకు అనుకూలురైన వారికి టెండర్లు దక్కేలా చేసిందనే ఆరోపణలతో ప్రజల ముందుకు వెళ్లడానికి టిటిడిపి నేతలు నిర్ణయించుకున్నట్లుగా తెలుస్తోంది. పోలవరం టెండర్లపై మూడు నెలలుగా స్పందించని టిఆర్ఎస్ అధినేత నారా చంద్రబాబు నాయుడు తాము ఆధారాలు బయట పెట్టిన తర్వాత స్పందించడాన్ని వారు ఇప్పటికే ప్రశ్నిస్తున్నారు. ఇన్నాళ్లూ ఏం చేశారంటున్నారు. దీనిపై టిఆర్ఎస్ వద్ద సమాధానం లేదని వారు భావిస్తున్నారు. దీంతో రాజకీయ ప్రయోజనాల కోసమే టిఆర్ఎస్ సెంటిమెంట్ వాడుకుంటుందనే భావన ప్రజల్లోకి బలంగా తీసుకు పోవాలని వారు భావిస్తున్నారు. తెలంగాణలో పార్టీని కాపాడుకోవడానికి టిడిపి వచ్చిన ఏ అవకాశాన్ని వదులుకోవడం లేదు. గతంలో అందరూ రాజీనామాలు చేసినప్పటికీ తామే మొదట రాజీనామాలు చేశామని చెబుతూ ప్రజల్లోకి బస్సుయాత్ర ద్వారా వెళ్లారు.

Published On October 25, 2011