కోమటిరెడ్డి వెంకట్‌ రెడ్డిపై గుర్రుమన్న దామోదర్ రెడ్డి

By Srinivas

Published: Tuesday, November 1, 2011, 14:13 [IST]

నల్గొండ: మాజీ మంత్రి కోమటిరెడ్డి ఆమరణ దీక్షపై జిల్లాకే చెందిన మరో మాజీ మంత్రి రాంరెడ్డి దామోదర్ రెడ్డి మండిపడ్డారు. పార్టీలోనే ఉంటూ కొందరు తెలంగాణ రాష్ట్ర సమితితో రహస్య ఒప్పందం చేసుకున్నారని ఆయన ఆరోపించారు. తెలంగాణ కోసం ఉద్యమించేందుకు త్వరలో కాంగ్రెసు తెలంగాణ యాక్షన్ ఫోరం ఏర్పాటు చేస్తామన్నారు. టిఆర్ఎస్ తన రాజకీయ లబ్ధి కోసమే వలసలను ప్రోత్సహిస్తోందని విమర్శించారు. తెలంగాణ ఏర్పాటుపై కెసిఆర్‌కు చిత్తశుద్ధి లేదన్నారు. జెండాలు పక్కన పెట్టి ఒకే ఎజెండాతో పని చేసేందుకు కెసిఆర్ సిద్ధంగా లేరన్నారు.

పదకొండేళ్లుగా టిఆర్ఎస్ సాధించిందేమిటో చెప్పాలన్నారు. రాజకీయ ప్రక్రియ ద్వారానే తెలంగాణ సాధ్యమవుతుందన్నారు. సకల జనుల సమ్మె వల్ల తెలంగాణ ప్రజలే నష్టపోయారని ఆయన ఆవేదన వ్యక్తం చేశారు. పార్టీలోనే ఉంటూ కొందరు టిఆర్ఎస్‌తో రహస్య ఒప్పందం చేసుకుంటున్నారని ధ్వజమెత్తారు. ప్రభుత్వాన్ని కూల్చే దమ్ము ఎవరికీ లేదన్నారు. రాజకీయ ప్రక్రియ ద్వారానే తెలంగాణ సాధ్యమన్నారు. విద్యుత్ ఉద్యోగుల సమ్మె వల్ల కరెంట్ సరఫరా ఆగిపోయి రైతులు తీవ్రంగా నష్టపోయారన్నారు. ఆయన సూర్యాపేటలో నల్ల చొక్కా ధరించి జాతీయ జెండా ఎగుర వేశారు.

Published On November 1, 2011