గాలికి స్పెషల్ క్లాస్ ఖైదీ స్థాయి వద్దు: సిబిఐ వాదన

హైదరాబాద్: అక్రమ మైనింగ్ కేసులో అరెస్టయిన కర్ణాటక మాజీ మంత్రి గాలి జనార్దన్ రెడ్డికి, ఓబుళాపురం మైనింగ్ కంపెనీ మేనేజింగ్ డైరెక్టర్ బివి శ్రీనివాస్ రెడ్డికి ప్రత్యేక తరగతి ఖైదీల గుర్తింపు ఇవ్వకూడదని సిబిఐ కోర్టు ముందు వాదించింది. ఆ స్థాయికి వారిద్దరు తగినవారు కాదని సిబిఐ వాదించింది. తాము వ్యాపారవేత్తలం కాబట్టి తమను ప్రత్యేక ఖైదీలుగా గుర్తించాలని జనార్దన్ రెడ్డి, శ్రీనివాస రెడ్డి కోర్టులో పిటిషన్ దాఖలు చేసుకున్నారు. ఆ పిటిషన్‌పై బుధవారం వాదనలు ముగిశాయి. తీర్పును కోర్టు ఈ నెల 4వ తేదీ వాయిదా వేసింది. ప్రత్యేక వసతులు పొందడానికి ప్రత్యేక సెల్ కేటాయించడానికి వీలైన ప్రత్యేక ఖైదీగా గుర్తించడానికి కావాల్సిన సామాజిక హోదా గాలి జనార్దన్ రెడ్డికి లేదని సిబిఐ వాదించింది.

గాలి జనార్దన్ రెడ్డి సామాన్య కానిస్టేబుల్ కుమారుడని, అక్రమ మైనింగ్ ద్వారా సంపాదించారని, అందువల్ల ప్రత్యేక ఖైదీగా గాలిని గుర్తించాల్సిన అవసరం లేదని సిబిఐ వాదించింది. సత్యం కుంభకోణం కేసులో రామలింగరాజుకు వర్తించే నిబంధనలు గాలి జనార్దన్ రెడ్డికి వర్తించవని సిబిఐ అభిప్రాయపడింది. కాగా, గాలి జనార్దన్ రెడ్డి నివాసంలో సిబిఐ స్వాధీనం చేసుకున్న నగదును తమకు అప్పగించాలని కోరుతూ ఐటి శాఖ కోర్టులో పిటిషన్ దాఖలు చేసింది. గాలి జనార్దన్ రెడ్డి 120 కోట్ల రూపాయల ఆదాయం పన్ను బాకీ పడ్డారని, అందువల్ల సిబిఐ స్వాధీనం చేసుకున్న నగదును తమకు అప్పగిస్తే దాన్ని భర్తీ చేసుకుంటామని ఐటి శాఖ అన్నది.

English summary

CBI argued that Gali Janardhan Reddy will not be treated as special prisoner.