సమైక్యం ఓకే, చెర్రీపై ఎందుకన్నారో: బాలయ్యపై చిరు

By Srinivas

Published: Wednesday, November 2, 2011, 11:13 [IST]

తిరుపతి: యువరత్న నందమూరి బాలకృష్ణ వాస్తవమే చెప్పారని తిరుపతి శాసనసభ్యుడు చిరంజీవి బుధవారం అన్నారు. తన తనయుడు రామ్ చరణ్ తేజపై బాలయ్య ఎందుకు అలాంటి వ్యాఖ్యలు చేశారో తనకు తెలియదన్నారు. ప్రతి విషయంలో మంచి చెడు రెండూ ఉంటాయన్నారు. బాలకృష్ణలాంటి సీనియర్ నటుడు అలా చెప్పారంటే అందులో నిజం ఉంటుందన్నారు. బక్రీద్ తర్వాత తెలంగాణ ఏర్పాటుపై నిర్ణయం ఉండదని సమస్య పరిష్కారానికి మార్గం ఎలా ఉండాలో ప్రకటిస్తారన్నారు. తెలంగాణ సమస్య పరిష్కార ప్రక్రియ మాత్రమే వేగవంతమవుతుందన్నారు. కాగా బాలయ్య కూడా రాష్ట్రం విడిపోకుండా సుభిక్షంగా ఉండాలని మంగళవారం ఓ కార్యక్రమంలో చెప్పిన విషయం తెలిసిందే.

చర్చల ద్వారానే సమస్యలు పరిష్కారమవుతాయని చెప్పారు. అధిష్టానం సాధ్యమైనంత త్వరగా తెలంగాణ సమస్యను పరిష్కరించాలని కోరారు. భాషా ప్రయుక్త రాష్ట్రాల పరంగానే ఆంధ్ర ప్రదేశ్ రాష్ట్రం ఏర్పడిందని మరో మంత్రి సాకే శైలజానాథ్ అన్నారు. రాష్ట్రం సమైక్యాంగానే ఉండాలని, ఉంటుందని ఆయన అభిప్రాయపడ్డారు. ఎవరి ఒత్తిళ్ల వల్లనో రాష్ట్రాలు ఏర్పడవన్నారు.

Published On November 2, 2011