జగన్ అబద్ధాలకోరు, తప్పులు చెప్పారు: చంద్రబాబు

By Pratap

Published: Friday, November 4, 2011, 22:10 [IST]

కర్నూలు: తనపై వైయస్సార్ కాంగ్రెసు పార్టీ అధ్యక్షుడు వైయస్ జగన్ సిబిఐ ముందు చెప్పిన విషయాలపై తెలుగుదేశం పార్టీ అధ్యక్షుడు నారా చంద్రబాబు నాయుడు విరుచుకుపడ్డారు. రైతు పోరుబాటలో భాగంగా కర్నూలు జిల్లాలో పాదయాత్ర చేసిన ఆయన శుక్రవారం సాయంత్రం మీడియా ప్రతినిధులతో మాట్లాడారు. వైయస్ జగన్ అబద్ధాలకోరు అని, సిబిఐకి తనపై తప్పుడు సమాచారం ఇచ్చారని ఆయన అన్నారు. కర్ణాటక మాజీ మంత్రి గాలి జనార్దన్ రెడ్డికి ఓబుళాపురం మైనింగ్ కంపెనీ (ఒఎంసి)కి తాను అనుమతి ఇవ్వలేదని ఆయన స్పష్టం చేశారు. కానిస్టేబుల్ కొడుకు అయిన గాలి జనార్దన్ రెడ్డికి 60 గదుల ఇల్లు ఉందని, తనకు కేవలం మూడు గదుల ఇల్లు మాత్రమే ఉందని ఆయన అన్నారు. గాలి జనార్దన్ రెడ్డి గనుల అక్రమ తవ్వకాలపై కేంద్ర, రాష్ట్ర ప్రభుత్వాలే చర్యలు తీసుకోలేదని ఆయన అన్నారు. వైయస్ జగన్మోహన్ రెడ్డికి ఇడుపులపాయ, హైదరాబాద్, బెంగళూర్‌ల్లో ప్యాలెస్‌లున్నాయని ఆయన అన్నారు.

పార్టీలకు అతీతంగా గాలి జనార్దన్ రెడ్డి, వైయస్ రాజశేఖర రెడ్డి ఒక్కటై ప్రజాధనాన్ని దోచుకున్నారని ఆయన ఆరోపించారు. తన పాలనలో ఉద్యోగాలు, ఉపాధి కోసం ప్రాజెక్టులను తెస్తే సమీక్షల పేరుతో వైయస్ రాజశేఖర రెడ్డి దోచుకున్నారని ఆయన అన్నారు. అప్పులు తీర్చుకోవడానికి ఇల్లు అమ్ముకోవడానికి అనుమతి ఇవ్వాలని కోరిన వైయస్ రాజశేఖర రెడ్డి ఇన్ని భవనాలు ఎలా కట్టారని ఆయన అడిగారు. రైతులు, పేదలు కష్టాల్లో ఉంటే అవినీతి సొమ్ముతో విలాసవంమైన జీవితాలను ప్రభుత్వంలోని పెద్దలు అనుభవిస్తున్నారని ఆయన విమర్శించారు.

Published On November 4, 2011