కేంద్రమంత్రి జైపాల్ రెడ్డి విజ్ఞప్తికి కోమటిరెడ్డి తిరస్కరణ

By Srinivas

Published: Monday, November 7, 2011, 11:57 [IST]

హైదరాబాద్: కేంద్రమంత్రి జైపాల్ రెడ్డి మాజీ మంత్రి కోమటిరెడ్డి వెంకట్ రెడ్డిని సోమవారం ఫోన్లో పరామర్శించారు. కేంద్రం తెలంగాణ సమస్యను పరిష్కరించే దిశలో ఆలోచిస్తుందని దీక్ష విరమించాలని కోరారు. అయితే జైపాల్ రెడ్డి విజ్ఞప్తిని కోమటిరెడ్డి తోసిపుచ్చారు. కేంద్రం నుండి స్పష్టమైన ప్రకటన వచ్చే వరకు దీక్ష విరమించేది లేదని సున్నితంగా తిరస్కరించారు. తెలంగాణకు అభివృద్ధి మండళ్లు అనేది కేవలం ఊహాగానాలే అని మాజీ స్పీకర్ సురేష్ రెడ్డి సోమవారం హైదరాబాదులో కొట్టి పారేశారు. నిమ్స్‌లో చికిత్స పొందుతున్న కోమటిరెడ్డి వెంకట్ రెడ్డిని సురేష్ రెడ్డి ఉదయం పరామర్శించారు.

అనంతరం ఆయన మీడియాతో మాట్లాడారు. తెలంగాణపై కేంద్రం త్వరలో నిర్ణయం తీసుకోవాలని విజ్ఞప్తి చేశారు. అభివృద్ధి మండళ్లు అనేది కేవలం ఊహాగానాలేనన్నారు. తెలంగాణలోని నాలుగున్నర కోట్ల ప్రజల ఆకాంక్ష ప్రత్యేక రాష్ట్రమే అన్నారు. ఉద్యోగ సంఘాల నేతలు కూడా కోమటిరెడ్డిని పరామర్శించారు. తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు మధ్యాహ్నం నిమ్స్ ఆసుపత్రికి వచ్చి కోమటిరెడ్డిని పరామర్శించనున్నట్లు సమాచారం.

Published On November 7, 2011