వైయస్ జగన్ ఓదార్పు యాత్రకు ఎమ్మెల్యేల డుమ్మా

By Pratap

Published: Thursday, November 17, 2011, 20:01 [IST]

గుంటూరు: వైయస్సార్ కాంగ్రెసు పార్టీ అధ్యక్షుడు వైయస్ జగన్ రెండో విడత గుంటూరు జిల్లాలో చేపట్టిన ఓదార్పు యాత్రకు ఇద్దరు శాసనసభ్యులు దూరంగా ఉండడం చర్చనీయాంశంగా మారింది. బుధవారంనాటి ఓదార్పు యాత్రకు ప్రత్తిపాడు శాసనసభ్యురాలు సుచరిత, మాచర్ల శాసనసభ్యుడు పిన్నెల్లి రామకృష్ణా రెడ్డి గైర్హాజరయ్యారు. వైయస్ జగన్ వర్గానికి చెందిన శాసనసభ్యులు తిరిగి కాంగ్రెసులోకి వెళ్లేందుకు ప్రయత్నాలు చేస్తున్నారని వార్తలు వెలువడుతున్న నేపథ్యంలో వారిద్దరి డుమ్మా ఆలోచన రేకెత్తిస్తోంది. పిన్నెల్లి రామకృష్ణా రెడ్డి గురువారం ఉదయం స్పీకర్ నాదెండ్ల మనోహర్‌ను కలిశారు.

సిబిఐ ఎఫ్ఐఆర్‌లో వైయస్ రాజశేఖర రెడ్డి పేరును చేర్చడాన్ని నిరసిస్తూ రాజీనామాలు చేసిన జగన్ వర్గం శాసనసభ్యుల్లో వారిద్దరు కూడా ఉన్నారు. మాజీ మంత్రి బాలినేని శ్రీనివాస రెడ్డి కూడా మొదటి రోజు యాత్రలో కనిపించకపోవడం అందరినీ ఆశ్చర్యపరిచింది. గురువారం జరిగిన ఓదార్పు యాత్రలో ఆయన తన తండ్రి గొప్పతనం గురించి మాట్లాడారు. వైయస్ రాజశేఖర రెడ్డిని ప్రజలు ప్రతి క్షణం స్మరించుకుంటూనే ఉంటారని ఆయన అన్నారు. వైయస్ రాజశేఖర రెడ్డి ప్రారంభించిన పథకాలు ప్రజల మనస్సుల్లో నిలిచిపోయాయని ఆయన అన్నారు.

Published On November 17, 2011