'ఆరోగ్యశ్రీ' పథకం వైయస్ విజయమ్మ ఆలోచనే?

By Pratap

Published: Friday, November 18, 2011, 10:22 [IST]

హైదరాబాద్: రాష్ట్రంలో ప్రతిష్టాత్మకంగా ప్రవేశ పెట్టిన ఆరోగ్యశ్రీ పథకం దివంగత ముఖ్యమంత్రి వైయస్ రాజశేఖర రెడ్డి సతీమణి, పులివెందుల వైయస్సార్ కాంగ్రెసు పార్టీ శాసనసభ్యురాలు వైయస్ విజయమ్మదేనా అంటే అవుననే అన్నారు సాక్షాత్తూ ప్రభుత్వంలో ఉన్న సహకార మంత్రి కాసు వెంకట కృష్ణా రెడ్డి. ఆయన గురువారం గుంటూరు జిల్లాలోని గురజాల మండల రచ్చబండ కార్యక్రమంలో పాల్గొన్నారు. ఈ సందర్భంగా ఆయన మాట్లాడారు. గతంలో తన తల్లి ఆసుపత్రిలో ఉన్నప్పుడు వైయస్సార్ దంపతులు పరామర్శించేందుకు వచ్చారన్నారు.

ఆ సందర్భంలో వైయస్ విజయమ్మకు వచ్చిన ఆలోచన వైయస్‌కు చెప్పారని, ఆ తర్వాతే ఆయన తెల్లకార్డులు ఉన్న వారందరికీ ఈ పథకం దరిచేరేలా రూపకల్పన చేశారని చెప్పారు. కాగా వైయస్ ప్రవేశ పెట్టి పథకాల ఆలోచన కాంగ్రెసుదేనని ముఖ్యమంత్రి కిరణ్ కుమార్ రెడ్డి, పిసిసి చీఫ్ బొత్స సత్యనారాయణతో సహా పలువురు నేతలు అంటున్నారు. అంతేకాదు గత రచ్చబండ కార్యక్రమంలో ఆరోగ్యశ్రీ పథకం ఆలోచన తమదేనని సిఎం ప్రకటించారు. అయితే ఇప్పుడు మంత్రి కాసు మాత్రం వైయస్ విజయమ్మ ఆలోచన అని చెప్పడం విశేషం.

Published On November 18, 2011