వైయస్ జగన్‌పై నమ్మకం లేకే తిరిగొస్తున్నారు: డిఎల్

By Srinivas

Published: Wednesday, November 23, 2011, 15:27 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డిపై విశ్వాసం లేకే ఆయన వర్గం శాసనసభ్యులు తిరిగి సొంతగూటికి చేరుకుంటున్నారని మంత్రి డిఎల్ రవీంద్రా రెడ్డి బుధవారం అన్నారు. జగన్ వర్గం ఎమ్మెల్యేలు తిరిగొచ్చి కేవలం పార్టీకి మద్దతిస్తే సరిపోదని పార్టీ బలోపేతానికి కృషి చేయాలన్నారు. తన దయాదాక్షిణ్యాల పైనే రాష్ట్ర ప్రభుత్వం నడుస్తుందని ప్రగల్భాలు పలికిన జగన్ ఇప్పుడు ఏం మాట్లాడుతారని సవాల్ విసిరారు. జగన్ తిరిగి కాంగ్రెసులోకి వస్తాడన్న ప్రశ్నే ఉత్పన్నం కాదన్నారు.

ప్రభుత్వం ప్రతిష్టాత్మంగా ప్రవేశ పెట్టిన రూపాయికి కిలో బియ్యానికి తాను వ్యతిరేకమన్నారు. వచ్చే శీతాకాల అసెంబ్లీ సమావేశాలలో ప్రజా సమస్యలపై చర్చిస్తే బాగుంటుందని ఆయన అభిప్రాయపడ్డారు. నీట్ నుండి ఎంసెట్‌ను ప్రస్తుతానికి తొలగించడానికి కేంద్రం మౌఖికంగా హామీ ఇచ్చిందని, మెడికల్ కౌన్సిల్ ఆఫ్ ఇండియా ఇక సుప్రీం నుండి అనుమతి తీసుకోవాల్సి ఉందన్నారు.

Published On November 23, 2011