చర్చల తర్వాతే: తెలంగాణపై పెదవి విప్పిన సోనియా

By Srinivas

Published: Wednesday, November 23, 2011, 12:07 [IST]

న్యూఢిల్లీ: తెలంగాణ అంశంపై ఏఐసిసి అధ్యక్షురాలు సోనియా గాంధీ పెదవి విప్పారు. ఈ అంశంపై తెలంగాణ ప్రాంత పార్లమెంటు సభ్యులు రెండు రోజులుగా అసెంబ్లీలో నిరసన తెలుపుతున్న విషయం తెలిసిందే. దీంతో తెలంగాణ ప్రాంత కాంగ్రెసు ఎంపీలకు సోనియా గాంధీ సర్ది చెప్పే ప్రయత్నాలు చేసినట్లుగా సమాచారం. తెలంగాణపై కోర్ కమిటీ సభ్యులు మల్లగుల్లాలు పడుతున్నారని ఎంపీలతో ఆమె చెప్పారు. యుపిఏ భాగస్వామ్య పక్షాలతో చర్చలు జరుగుతున్నాయని చర్చల అనంతరం తెలంగాణపై ఓ నిర్ణయానికి వస్తామని చెప్పారు. నిర్ణయం ప్రకటించే వరకు అభివృద్ధిపై దృష్టి సారించాలని ముఖ్యమంత్రి కిరణ్ కుమార్ రెడ్డికి కూడా సూచించామని ఆమె ఎంపీలతో అన్నారు.

కాగా బుధవారం కూడా ఎంపీలు తెలంగాణకు అనుకూలంగా లోకసభలో ప్లకార్డులు ప్రదర్శించారు. తెలంగాణకు అనుకూలంగా నినాదాలు చేశారు. వెంటనే ప్రత్యేక రాష్ట్ర ప్రకటన చేయాలని డిమాండ్ చేశారు. సభ ప్రారంభం కాగానే ధరలు, తెలంగాణ అంశాలతో దద్దరిల్లింది. దీంతో స్పీకర్ మీరా కుమార్ సభను మధ్యాహ్నం పన్నెండు గంటలకు వాయిదా వేశారు. రాజ్యసభ కూడా మధ్యాహ్నానికి వాయిదా పడింది. అనంతరం పన్నెండు గంటలకు రెండు సభలు ప్రారంభమైనప్పటికీ గందరగోళం చెలరేగడంతో లోకసభ స్పీకర్, రాజ్యసభ చైర్మన్‌లు సభలను గురువారానికి వాయిదా వేశారు.

Published On November 23, 2011