సుప్రీంలో రామోజీరావుకు ఎదురుదెబ్బ, నామాకు కూడా

By Srinivas

Published: Wednesday, November 23, 2011, 16:45 [IST]

న్యూఢిల్లీ: ఈనాడు సంస్థల అధినేత రామోజీ రావు, ఖమ్మం పార్లమెంటు సభ్యుడు నామా నాగేశ్వర రావు, టిడిపి నేత సిఎం రమేష్‌లకు సుప్రీం కోర్టులో బుధవారం చుక్కెదురైంది. వైయస్సార్ కాంగ్రెసు పార్టీ గౌరవ అధ్యక్షురాలు వైయస్ విజయమ్మ వేసిన పిటిషన్ మేరకు టిడిపి చీఫ్ చంద్రబాబు నాయుడు ఆస్తులపై ప్రాథమిక విచారణ జరపాల్సిందిగా హైకోర్టు తీర్పు ఇచ్చిన విషయం తెలిసిందే. ఇందులో రామోజీ, సిఎం రమేష్, నామా ప్రతివాదులు. వీరు ఈ కేసు విషయంలో సుప్రీం కోర్టును ఆశ్రయించారు. బుధవారం జస్టిస్ భండారీ, దీపక్ మిశ్రాలతో కూడిన ధర్మాసనం వారి పిటిషన్లను తోసి పుచ్చింది. ఈ కేసు విషయంలో హైకోర్టుకే వెళ్లాలని వారికి సూచించింది. తాము ఈ సమయంలో జోక్యం చేసుకోలేమని తేల్చి చెప్పింది. అయితే పిటిషన్ దారులు వస్తే పదిహేను రోజుల్లో తీర్పు ఇవ్వాలని హైకోర్టుకు సుప్రీం సూచించింది. హైకోర్టు తీర్పు సంతృప్తికరంగా లేకుంటే సుప్రీంకోర్టుకు రావచ్చునని తెలిపింది.

కాగా వైయస్ విజయమ్మ తన తప్పుడు ఆరోపణలతో హైకోర్టును తప్పుదోవ పట్టించారని రామోజీ, నామా, సిఎం రమేష్‌లు సుప్రీం కోర్టును ఆశ్రయించారు. తమ కార్పోరేట్ సంస్థల పరువు ప్రతిష్టల దృష్ట్యా సిబిఐ విచారణను నిలుపుదల చేయాలని కోరారు. కాగా హైకోర్టు తమ వాదనలు వినకుండానే ప్రాథమిక విచారణకు ఆదేశించిన నేపథ్యంలో దానిని నిలుపుదల చేయాలని కోరారు.

Published On November 23, 2011