చంద్రబాబు సహా 13 మందిపై సిబిఐ కేసు నమోదు

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు సహా 13 మందిపై సిబిఐ కేసు నమోదు చేసింది. వైయస్సార్ కాంగ్రెసు పార్టీ గౌరవాధ్యక్షురాలు వైయస్ విజయమ్మ వేసిన పిటిషన్‌పై హైకోర్టు ఆదేశాల మేరకు వారిపై సిబిఐ కేసు నమోదు చేసి ప్రాథమిక విచారణకు శ్రీకారం చుట్టింది. సోమవారంనుంచి వారికి నోటీసులు జారీ చేసే అవకాశం ఉంది. చంద్రబాబుతో పాటు ఆయన భార్య భువనేశ్వరి, కుమారుడు నారా లోకేష్, తెలుగుదేశం పార్లమెంటు సభ్యులు నామా నాగేశ్వర రావు, సుజనా చౌదరి తదితరులకు సిబిఐ నోటీసులు జారీ చేయనుంది. సుప్రీంకోర్టు సూచన మేరకు ఇప్పటికే కొద్ది మంది హైకోర్టులో వెకేట్ పిటిషన్ దాఖలు చేశారు.

చంద్రబాబు సతీమణి భువనేశ్వరి, కుమారుడు లోకేష్ తదితరులు సోమవారం హైకోర్టులో వెకేట్ పిటిషన్ దాఖలు చేయాలనే యోచనలో ఉన్నారు. ఈ స్థితిలో సిబిఐ వారిపై ప్రాథమిక విచారణను ప్రారంభిస్తోంది. చంద్రబాబు ఆస్తుల కేసును సిబిఐ జాయింట్ డైరెక్టర్ లక్ష్మినారాయణనే పర్యవేక్షిస్తారు. వైయస్ జగన్ ఆస్తుల కేసును, గాలి జనార్దన్ రెడ్డి గనుల అక్రమ తవ్వకాల కేసును కూడా ఆయనే పర్యవేక్షిస్తున్నారు.

English summary

CBI has began prelimenary enquiry on TDP president N Chandrababu Naidu assets case.