రేపు లేదా ఎల్లుండి టిడిపి అవిశ్వాస తీర్మానం నోటీసు

హైదరాబాద్: ముఖ్యమంత్రి కిరణ్ కుమార్ రెడ్డి ప్రభుత్వంపై వచ్చే శాసనసభ శీతాకాలం సమావేశాల్లో అవిశ్వాస తీర్మానం ప్రతిపాదించాలని తెలుగుదేశం పార్టీ ఓ నిర్ణయానికి వచ్చింది. పార్టీ నాయకులతో సోమవారం జరిగిన సమావేశంలో పార్టీ అధ్యక్షుడు, ప్రతిపక్ష నేత ఈ మేరకు ఓ నిర్ణయం తీసుకున్నారు. రేపు లేదా ఎల్లుండి అవిశ్వాస తీర్మానానికి నోటీసు ఇస్తామని సమావేశానంతరం టిడిపి శానససభ్యుడు పయ్యావుల కేశవ్ మీడియా ప్రతినిధులతో చెప్పారు. శాసనసభ సమావేశాలు ఐదారు రోజులు మాత్రమే జరుగుతాయని ప్రచారం జరుగుతున్న నేపథ్యంలో ముందుగానే అవిశ్వాస తీర్మానం నోటీసు ఇవ్వాలని తెలుగుదేశం పార్టీ నిర్ణయించుకున్నట్లు తెలుస్తోంది.

ముందుగా నోటీసు ఇవ్వడం వల్ల సభా వ్యవహారాల సంప్రదింపుల కమిటీలో దానిపై చర్చకు, ఓటింగుకు తేదీలు ఖరారు చేసే అవకాశం ఉంటుందని తెలుగుదేశం నాయకులు నాయకులు భావిస్తున్నట్లు తెలుస్తోంది. అయితే, శాసనసభ సమావేశాలు జరుగుతున్న సమయంలోనే అవిశ్వాస తీర్మానానికి నోటీసు ఇవ్వాలనే చర్చ గతంలో ఓసారి జరిగింది. స్పీకర్ ఎన్నిక సమయంలో ముందుగానే తెలుగుదేశం పార్టీ అవిశ్వాసానికి నోటీసు ఇచ్చింది. స్పీకర్ ఎన్నికను పూర్తి చేసినా, అవిశ్వాస తీర్మానాన్ని మాత్రం సభ చేపట్టలేదు.

English summary

TDP president N Chandrababu Naidu has decided to propose No- Confidence motion on CM Kiran Kumar Reddy Government.