శ్రీలక్ష్మికి ఊరట, షరతులతో కూడిన బెయిల్ మంజూరు

హైదరాబాద్: కర్ణాటక మాజీ మంత్రి గాలి జనార్దన్ రెడ్డి కేసులో ఐఎఎస్ అధికారి శ్రీలక్ష్మికి ఊరట లభించింది. తనకు బెయిల్ అయినా మంజూరు చేయాలి లేదా సిబిఐ కార్యాలయంలోనైనా ఉండనివ్వాలని వేడుకున్న ఆమెకు సిబిఐ ప్రత్యేక కోర్టు ఆమెకు శుక్రవారం షరతులతో కూడిన బెయిల్ మంజూరు చేసింది. రూ. 25 వేల రూపాయల వ్యక్తిగత పూచీకత్తు, ఇద్దరు వ్యక్తుల జమానతుపై కోర్టు ఆమెకు బెయిల్ మంజూరు చేసింది. పాస్‌పోర్టును స్వాధీనం చేయాలని కూడా కోర్టు ఆమెను ఆదేశించింది.

విదేశాలకు పారిపోయే ప్రయత్నం చేయరాదని, సాక్ష్యాలను తారుమారు చేసేందుకు ప్రయత్నించకూడదని సిబిఐ కోర్టు ఆమెకు ఆదేశాలు జారీ చేసింది. విచారణకు సహకరించాలని, దర్యాప్తు అధికారికి అందుబాటులో ఉండాలని కూడా ఆదేశాలు జారీ చేసింది. హృద్రోగి కావడంతో ఆరోగ్య కారణాలను దృష్టిలో పెట్టుకుని సిబిఐ కోర్టు శ్రీలక్ష్మికి బెయిల్ మంజూరు చేసినట్లు తెలుస్తోంది. శ్రీలక్ష్మికి బెయిల్ మంజూరు కావడం గాలి జనార్దన్ రెడ్డి అక్రమ మైనింగ్ కేసులో ఓ మలుపు అనే చెప్పవచ్చు. గాలి జనార్దన్ రెడ్డి అక్రమ మైనింగ్ కేసులో ఈ నెల 3వ తేదీలోగా సిబిఐ చార్జిషీట్ దాఖలు చేయాల్సి ఉంది. శ్రీలక్ష్మి శుక్రవారం సాయంత్రం ఐదు గంటల ప్రాంతంలో హైదరాబాదులోని చంచల్‌గుడా జైలు నుంచి విడుదలయ్యారు.

English summary

Nampally CBI court has granted bail to IAS officer Srilakshmi in Gali Janardhan reddy illegal mining case.