శ్రీలక్ష్మి పిటిషన్‌పై విచారణ వాయిదా, రాజశేఖర్ అరెస్టు

హైదరాబాద్: తనను జైలులో ప్రత్యేక కెటగిరీ ఖైదీగా గుర్తించాలని ఐఎఎస్ అధికారి శ్రీలక్ష్మి పెట్టుకున్న పిటిషన్‌పై విచారణను హైదరాబాదులోని నాంపల్లి కోర్టు సోమవారానికి వాయిదా వేసింది. తనను ప్రత్యేక ఖైదీగా గుర్తించి, తనకు ప్రత్యేక వసతులు కల్పించాలని కోరుతూ ఆమె పిటిషన్ దాఖలు చేసింది. కర్ణాటక మాజీ మంత్రి గాలి జనార్దన్ రెడ్డి అక్రమ మైనింగ్ కేసులో అరెస్టయిన శ్రీలక్ష్మికి కోర్టు ఈ నెల 12వ తేదీ వరకు కోర్టు జ్యుడిషియల్ రిమాండ్ విధించిన విషయం తెలిసిందే. ఆమె ప్రస్తుతం హైదరాబాదులోని చంచల్‌గుడా మహిళా జైలులో ఉన్నారు.

కాగా, గాలి జనార్దన్ రెడ్డి అక్రమ మైనింగ్ కేసులో సిబిఐ అధికారులు మరొకరిని అరెస్టు చేశారు. ఓబుళాపురం మైనింగ్ కంపెనీ (ఒఎంసి) డైరెక్టర్ రాజశేఖర్‌ను సిబిఐ అధికారులు శుక్రవారం కర్ణాటకలో బళ్లారిలో అరెస్టు చేశారు. ఆయనను హైదరాబాదు తరలిస్తున్నట్లు సమాచారం. రాజశేఖర్ గాలి జనార్దన్ రెడ్డి అక్రమ మైనింగ్ కేసులో అరెస్టయిన ఐఎఎస్ అధికారి రాజగోపాల్ బావమరిది. రాజశేఖర్‌ను సిబిఐ అరెస్టు చేసే అవకాశాలున్నట్లు చాలా రోజులుగా ప్రచారం సాగుతోంది. రాజశేఖర్ అరెస్టుతో గాలి జనార్దన్ రెడ్డి కేసులో ఇప్పటి వరకు సిబిఐ అరెస్టు చేసినవారి సంఖ్య ఐదుకు చేరుకుంది.

English summary

Hearing on IAS officer Srilakshmi's petition was adjourned for monday in Gali Janardhan Reddy's case.