సబిత కోణంపై పరిశీలిస్తున్నాం: లక్ష్మినారాయణ

By Pratap

Published: Saturday, December 3, 2011, 15:44 [IST]

హైదరాబాద్: కర్ణాటక మాజీ మంత్రి గాలి జనార్దన్ రెడ్డి అక్రమ మైనింగ్ కేసు విషయంలో అప్పటి గనుల శాఖ మంత్రి సబితా ఇంద్రారెడ్డిపై వచ్చిన ఆరోపణల కోణాన్ని పరిశీలిస్తున్నామని సిబిఐ జాయింట్ డైరెక్టర్ లక్ష్మినారాయణ చెప్పారు. గాలి జనార్దన్ రెడ్డి కేసులో తాము చార్జిషీట్ దాఖలు చేసిన విషయాన్ని ఆయన శనివారం మీడియా ప్రతినిధులతో చెప్పారు. ఈ సందర్భంలో సబితా ఇంద్రారెడ్డి విషయాన్ని మీడియా ప్రతినిధులు ప్రస్తావించినప్పుడు ఆ కోణాన్ని పరిశీలిస్తున్నామని ఆయన చెప్పారు. దర్యాప్తు పూర్తయినవారిపై తాము చార్జిషీట్ దాఖలు చేశామని ఆయన చెప్పారు.

గాలి జనార్దన్ రెడ్డి అక్రమ మైనింగ్ కేసులో మరి కొంత మందిపై దర్యాప్తు సాగుతోందని, సాక్ష్యాలను బట్టి మిగతా వారిపై చర్యలు తీసుకుంటామని ఆయన చెప్పారు. వారి పేర్లను చార్జిషీట్‌లో చేర్చలేదని ఆయన చెప్పారు. తదుపరి దర్యాప్తు ఫలితాలను బట్టి అనుబంధ చార్జిషీట్‌ను దాఖలు చేస్తామని ఆయన చెప్పారు. గాలి జనార్దన్ రెడ్డి అక్రమ మైనింగ్ కేసులో తాము శాస్త్రీయపరమైన దర్యాప్తు కూడా చేశామని ఆయన చెప్పారు. గాలి జనార్దన్ రెడ్డి అక్రమ మైనింగ్ కేసులో ఐఎఎస్ అధికారి శ్రీలక్ష్మిని అరెస్టు చేసినప్పటికీ ఆమె పేరును చార్జిషిట్‌లో చేర్చలేదు. దీనిపై చార్జిషీట్‌లో సిబిఐ వివరణ ఇచ్చింది.

Published On December 3, 2011