జగన్ ఎమ్మెల్యేల కోసం కాంగ్రెసు చివరి ప్రయత్నాలు

హైదరాబాద్: ముఖ్యమంత్రి కిరణ్ కుమార్ రెడ్డి ప్రభుత్వానికి మద్దతుగా శానససభలో ఓటేయించడానికి కాంగ్రెసు నాయకులు చివరి ప్రయత్నాలు చేస్తున్నారు. కొంత మంది నాయకులు, మంత్రులు, శాసనసభ్యులు బాధ్యతలు తీసుకుని వైయస్ జగన్ వర్గానికి చెందిన శాసనసభ్యులతో చర్చలు జరుపుతున్నారు. ప్రభుత్వానికి వ్యతిరేకంగా ఓటు చేస్తే వెంటనే అనర్హత వేటు పడుతుందని కూడా వారు చెబుతున్నారు. ఇప్పటికే కొంత మంది శాసనసభ్యులను కాంగ్రెసు తమ వైపు లాక్కోగలిగింది. ఓ వైపు రాజ్యసభ సభ్యుడు కెవిపి రామచందర్ రావు జగన్ వర్గం శానససభ్యులతో చర్చలు జరుపుతుండగానే ఇతర నాయకులు కూడా తమ ప్రయత్నాలు సాగిస్తున్నారు.

జగన్ వర్గానికి చెందిన శాసనసభ్యులు శ్రీకాంత్ రెడ్డి, శ్రీనివాసులులతో మంత్రి డిఎల్ రవీంద్రారెడ్డి, వీరశివా రెడ్డి, కాటసాని రాంభూపాల్ రెడ్డి మాట్లాడుతున్నారు. కెవిపి రామచందర్ రావు ఇప్పటికే ఆదినారాయణ రెడ్డి తదితర శాసనసభ్యులతో మాట్లాడారు. డిప్యూటీ స్పీకర్ మల్లు భట్టి విక్రమార్క ప్రసాద రాజు, ధర్మాన కృష్ణదాసులతో చర్చలు జరిపారు. బాలరాజును కూడా కాంగ్రెసు నాయకులు సంప్రదిస్తున్నారు. తెలుగుదేశం పార్టీ ప్రతిపాదించిన అవిశ్వాస తీర్మానంపై ఓటింగు జరిగే సమయానికి సాధ్యమైనంత ఎక్కువ మందిని తమ వైపు తిప్పుకోవాలనేది కాంగ్రెసువ్యూహంగా కనిపిస్తోంది.

English summary

Congress party leaders are putting last efforts to woo YS Jagan camp MLAs.